სტუ-ის ორგანიზებით გაიმართა საერთაშორისო სამეცნიერო კონფერენცია – „თანამედროვე გამოწვევები და მიღწევები ინფორმაციულ და საკომუნიკაციო ტექნოლოგიებში – 2025“

საქართველოს ტექნიკური უნივერსიტეტის, ბათუმის შოთა რუსთაველის სახელმწიფო უნივერსიტეტის, დრეზდენის გამოყენებით მეცნიერებათა უნივერსიტეტის (გერმანია) და ბიელსკო-ბიალას უნივერსიტეტის (პოლონეთი) ორგანიზებით, ბათუმში გაიმართა ბსუ-ის 90 წლისთავისადმი მიძღვნილი IV საერთაშორისო სამეცნიერო-პრაქტიკული კონფერენცია – „თანამედროვე გამოწვევები და მიღწევები ინფორმაციულ და საკომუნიკაციო ტექნოლოგიებში – 2025“.

კონფერენციის მიზნები ინფორმაციული და საკომუნიკაციო ტექნოლოგიების სფეროში თანამედროვე ტენდენციების, გამოწვევებისა და მიღწევების განხილვა, ინოვაციური იდეების გაზიარება და საერთაშორისო სამეცნიერო თანამშრომლობის გაღრმავება იყო. ღონისძიებაში მონაწილეობდნენ როგორც საქართველოს, ისე სხვადასხვა ქვეყნის წამყვანი მეცნიერები, მკვლევრები, დოქტორანტები, ასევე, ინფორმაციული ტექნოლოგიების სფეროს პროფესიონალები და ექსპერტები. კონფერენციის ფარგლებში წარმოდგენილი იყო მრავალი საინტერესო მოხსენება და კვლევა ისეთ თემატურ მიმართულებებით, როგორიცაა: ინფორმაციული და საკომუნიკაციო ტექნოლოგიები; ფიზიკა-მათემატიკა და ჰუმანიტარულ -სოციალური მეცნიერებები. 

სტუ-ის ინფორმატიკისა და მართვის სისტემების ფაკულტეტის დეკანის თქმით, კონფერენცია მნიშვნელოვნად შეუწყობს ხელს მეცნიერებასა და პრაქტიკას შორის კავშირის გაღრმავებას, თანამედროვე ტექნოლოგიების განვითარებასა და ახალგაზრდა მკვლევრების პროფესიულ ზრდას. როგორც პროფესორი თალიკო ჟვანია აღნიშნავს, ღონისძიების ორგანიზატორებმა გამოთქვეს მზაობა, მომდევნო წლებში გააგრძელონ საერთაშორისო თანამშრომლობა და კიდევ უფრო მეტი მონაწილე ქვეყნისა და უნივერსიტეტის ჩართვა.

„ბათუმის შოთა რუსთაველის სახელმწიფო უნივერსიტეტს დაარსებიდან 90-ე წლისთავს ვულოცავ, წარმატებებს ვუსურვებ კოლეგებსა და სტუდენტებს. მოხარული ვართ, რომ უკვე მეოთხედ გვქონდა შესაძლებლობა, საქართველოსა და ევროპის წამყვანი უნივერსიტეტების წარმომადგენლებს ერთად დაგვესვა მნიშვნელოვანი შეკითხვები ინფორმაციულ და საკომუნიკაციო ტექნოლოგიებში არსებულ გამოწვევებზე. ეს პლატფორმა საშუალებას აძლევს როგორც გამოცდილ მეცნიერებს, ისე ახალგაზრდა მკვლევრებს, წარმოადგინონ საკუთარი ნაშრომები, გააზიარონ გამოცდილება და ერთად იმსჯელონ მომავლის ტექნოლოგიურ მიმართულებებზე. მსგავსი საერთაშორისო თანამშრომლობა უმნიშვნელოვანესია ჩვენი ქვეყნისთვის და საუნივერსიტეტო სივრცისთვის – როგორც აკადემიური ხარისხის ამაღლების, ისე ინოვაციური იდეების პრაქტიკაში გადმოტანის კუთხით“, – განაცხადა თალიკო ჟვანიამ.