“დანტეს დღე 2026” და „დანტე ალიგიერის საზოგადოების – თბილისის კომიტეტის“ 20 წლის იუბილე სტუ-ში

15-16 ივნისს, საქართველოს ტექნიკური უნივერსიტეტი იტალიური ენისა და კულტურის პოპულარიზაციისადმი მიძღვნილი სეზონის ფარგლებში, მნიშვნელოვან საერთაშორისო კულტურულ და აკადემიურ ღონისძიებებს მასპინძლობს, რომლებიც საქართველო-იტალიის კულტურული ურთიერთობების გაღრმავებასა და იტალიური ჰუმანიზმისა და ენის პოპულარიზაციას ეძღვნება.

ღონისძიებების განრიგი:

• 15 ივნისს, 19:00 საათზე, „დანტე ალიგიერის საზოგადოების“ გენერალური მდივანი, ხელოვნებათმცოდნე და ესეისტი, პროფესორი ალესანდრო მაზი წაიკითხავს საჯარო ლექციას თემაზე: „იტალიური ტრიპტიქი: ჯოტო, წმინდა ფრანცისკე, დანტე და იტალიური ჰუმანიზმის დაბადება“. ის მსმენელს გააცნობს იტალიური და ევროპული ცივილიზაციის სამი უდიდესი ფიგურის შემოქმედებით და სულიერ მემკვიდრეობას. პროფესორი მაზი განიხილავს შუა საუკუნეებიდან რენესანსზე გადასვლის პროცესს და ადამიანის როლის დაბრუნებას კულტურის, ხელოვნებისა და აზროვნების ცენტრში.
• 16 ივნისს, 17:00 საათზე საქართველოს ტექნიკურ უნივერსიტეტში „დანტეს საერთაშორისო დღე 2026“ და „დანტე ალიგიერის საზოგადოების – თბილისის კომიტეტის“ დაარსებიდან 20 წლის იუბილე აღინიშნება.

საიუბილეო ღონისძიება მიეძღვნება იტალიური ენისა და კულტურის პოპულარიზაციის ოცწლიანი საქმიანობის შეჯამებასა და საქართველო-იტალიის კულტურული თანამშრომლობის გაძლიერებას.

ღონისძიების ორგანიზატორები არიან „დანტე ალიგიერის საზოგადოების თბილისის კომიტეტი” და საქართველოს ტექნიკური უნივერსიტეტი, საქართველოში იტალიის საელჩოს მხარდაჭერით.

ღონისძიებას, რომელსაც საქართველოსა და იტალიის აკადემიური, კულტურული და დიპლომატიური წრეების წარმომადგენლები დაესწრებიან, საქართველოს ტექნიკური უნივერსიტეტის რექტორი, აკადემიკოსი დავით გურგენიძე გახსნის.

ღონისძებაზე მისასალმებელი სიტყვით გამოვლენ საქართველოში იტალიის რესპუბლიკის საგანგებო და სრულუფლებიანი ელჩი საქართველოში, მისი აღმატებულება მასიმილიანო დ’ანტუონო, პროფესორი ალესანდრო სალაკონე და თბილისის კომიტეტის პრეზიდენტი, პროფესორი ნინო ცერცვაძე; წარდგებიან პოეტი დათო მაღრაძე და მეცო-სოპრანო ნინო სურგულაძე.

პროგრამა მოიცავს ოფიციალურ გამოსვლებს, საიუბილეო ნაწილს, სერტიფიკატების გადაცემას და კულტურულ ნაწილს, რომელიც ეძღვნება საქართველო-იტალიის მეგობრობასა და საერთო ევროპულ კულტურულ მემკვიდრეობას.

ღონისძიებების ჩატარების ადგილი: საქართველოს ტექნიკური უნივერსიტეტი, ადმინისტრაციული კორპუსი, ნიკო მუსხელიშვილის საუნივერსიტეტო ბიბლიოთეკის საკონფერენციო დარბაზი (მისამართი: მერაბ კოსტავას ქ. №77)

ღონისძიებებზე დასწრება თავისუფალია.