სტუ-ის რექტორმა, აკადემიკოსმა დავით გურგენიძემ საქართველოს მეცნიერებათა ეროვნულ აკადემიას გიორგი ნიკოლაძის არითმომეტრის ზუსტი ასლი გადასცა

img.card-img-top{
object-position: 50% 25%;
}

საქართველოს ტექნიკური უნივერსიტეტის რექტორმა, აკადემიკოსმა დავით გურგენიძემ საქართველოს მეცნიერებათა ეროვნული აკადემიის პრეზიდენტს, აკადემიკოს როინ მეტრეველსა და მეცნიერებათა აკადემიას გიორგი ნიკოლაძის უნიკალური გამოგონების – “პირდაპირი გამრავლებისა და გაყოფის ელექტრული არითმომეტრის” რეკონსტრუირებული მოწყობილობა გადასცა.

გიორგი ნიკოლაძის არითმომეტრის ზუსტი ასლი სტუ-ის რექტორმა საქართველოს მეცნიერებათა ეროვნული აკადემიის პრეზიდენტს აკადემიაში მეცნიერების მსოფლიო დღისადმი მიძღვნილ ღონისძიებაზე გადასცა.

საქართველოს ტექნიკური უნივერსიტეტის რექტორის, დავით გურგენიძის განცხადებით, ნიკოლაძისეული არითმომეტრი, რომელმაც ფაქტობრივად, საქართველოში, ინფორმატიკასა და გამოთვლით ტექნიკას დაუდო სათავე, რეკონსტრუირებულ იქნა სტუ-ის ინფორმატიკისა და მართვის სისტემების ფაკულტეტის მკვლევართა ჯგუფის მიერ, პროფესორ ლევან იმნაიშვილის ხელმძღვანელობით.

როგორც რექტორმა აღნიშნა, „პირდაპირი გამრავლებისა და გაყოფის ელექტრული არითმომეტრის“ ნიკოლაძისეული მოდელი გასული საუკუნის 30-იან წლებში დაიკარგა, რეკონსტრუირებული საანგარიშოს უნიკალურობა კი იმაში მდგომარეობს, რომ საქართველოს ტექნიკური უნივერსიტეტის მეცნიერებმა მისი ზუსტი ასლი პარიზში დაცული აღწერილობის მიხედვით შექმნეს.

რექტორის განცხადებით, გიორგი ნიკოლაძის გამოგონების აღდგენამ, სათანადო, დამადასტურებელი დოკუმენტაციის მოძიებამ, რაც განხორციელდა საქართველოს ტექნიკურ უნივერსიტეტში, შესაძლებელია შეცვალოს ქართული კომპიუტერული ინჟინერიის ისტორია.

„მეცნიერების მსოფლიო დღესთან დაკავშირებით, პატივი გვაქვს, საქართველოს მეცნიერებათა ეროვნულ აკადემიასა და მის პრეზიდენტს, აკადემიკოს როინ მეტრეველს გადავცეთ საქართველოს ტექნიკური უნივერსიტეტის მეცნიერთა მიერ შექმნილი გიორგი ნიკოლაძის უნიკალური გამოგონების – არითმომეტრის ზუსტი ასლი. კომპიუტერული ტექნოლოგიების განვითარების დღევანდელი გადასახადიდან, გიორგი ნიკოლაძის არითმომეტრი იმ დროისათვის გარღვევა იყო გამოთვლით ტექნიკაში, რამდენადაც იყო პირველი ელექტრული მოწყობილობა, რომელიც პირდაპირი გამრავლებისა და გაყოფის ოპერაციებს ასრულებდა. პირდაპირი გამრავლების იდეა კი დღესაც ერთ-ერთი აქტუალური საკითხია”, – განაცხადა სტუ-ის რექტორმა, აკადემიკოსმა დავით გურგენიძემ.

მეცნიერების მსოფლიო დღისადმი მიძღვნილ ღონისძიებაზე საქართველოს მეცნიერებათა ეროვნული აკადემიის პრეზიდენტმა ქართველი მეცნიერები, მათ შორის საქართველოს ტექნიკური უნივერსიტეტის მკვლევრები, საპატიო სიგელებით დააჯილდოვა.