სტუ-ის სამეთვალყურეო საბჭოს პრეზიდენტმა ზუგდიდში ჟიული შარტავას ბიუსტის გახსნის ცერემონიაში მიიღო მონაწილეობა

„32 წელი შესრულდა ჟიული შარტავას ბოლო სექტემბრიდან. „მე ისეთი დამოუკიდებელი საქართველოს მომხრე ვარ, სადაც იქნება მაღალი პოლიტიკური კულტურა, ჭეშმარიტი ტოლერანტობა და ჭეშმარიტი დემოკრატია“, – ამ სიტყვების ავტორმა, რომლის კარიერა კომკავშირიდან დაიწყო, დამოუკიდებელ საქართველოში მხოლოდ ორიოდე წელი იცხოვრა.

ძალიან რთულია ემოციების გარეშე ისაუბრო ადამიანზე, რომელმაც თავისი ცხოვრების ერთი, მნიშვნელოვანი ეტაპი განვლო საქართველოს ტექნიკური უნივერსიტეტის კედლებში.

ჩვენ, მის კოლეგებსა და მეგობრებს, საბედნიეროდ, გვაქვს საშუალება მომავალ თაობებს მოვუყვეთ ადამიანის შესახებ, რომელმაც სიცოცხლე დაუნანებლად მიიტანა სამშობლოს სამსხვერპლოზე”, – ამის შესახებ საქართველოს ტექნიკური უნივერსიტეტის სამეთვალყურეო საბჭოს პრეზიდენტმა, პროფესორმა ზურაბ გუდავაძემ განაცხადა ზუგდიდში, ეროვნული გმირის, ჟიული შარტავას ბიუსტის გახსნაზე. 

დღეს, ზუგდიდში ჟიული შარტავას ბიუსტის გახსნის ცერემონიას საქართველოს ტექნიკური უნივერსიტეტის სამეთვალყურეო საბჭოს პრეზიდენტი ესწრებოდა. პროფესორ ზურაბ გუდავაძის თქმით, საქართველოს ტექნიკურ უნივერსიტეტში, სადაც ჟიული შარტავა სწავლობდა და მოღვაწეობდა, სტუდენტებსა და პროფესორ-მასწავლებლებს შორის ეროვნული გმირის სახელი სამარადჟამოდაა უკვდავყოფილი. 

„ჟიული შარტავა პირველი პირი იყო და შეეძლო თავი დაეხსნა, მაგრამ ეს არ გააკეთა, რითაც თაობებს მისცა მაგალითი თავგანწირვის და სამშობლოს სიყვარულისა, მაგალითი იმისა, თუ როგორ უნდა ემსახურო სამშობლოს და როგორი უნდა იყოს პატრიოტი.

საქართველოს ტექნიკურ უნივერსიტეტში ეროვნული გმირის სახელს ერთ-ერთი ულტრათანამედროვე ლაბორატორიული კომპლექსი ატარებს, სადაც სტუდენტები და მომავალი მეცნიერები კვლევებს უახლესი ტექნოლოგიების გამოყენებით ატარებენ.

დღეს, ზუგდიდში გაიხსნა ეროვნული გმირის ბიუსტი. სიმბოლურია, რომ ბატონი ჟიულის 32-ე ჩამქრალი სექტემბრის აღსანიშნად, ბაბუის ბიუსტი შვილიშვილმა, ლიკა შარტავამ გახსნა. მინდა წარმატებები ვუსურვო მას”, – განაცხადა ზურაბ გუდავაძემ. 

ჟიული შარტავა 1985-1986 წლებში რუსთავის საქალაქო კომიტეტს ხელმძღვანელობდა. პოლიტიკური, სახელმწიფო და საზოგადო მოღვაწე, აფხაზეთის ავტონომიური რესპუბლიკის მინისტრთა საბჭოსა და თავდაცვის საბჭოს თავმჯდომარე, 1993 წლის 27 სექტემბერს – სოხუმის დაცემის დღეს სეპარატისტებმა დახვრიტეს. 2004 წელს ჟიული შარტავას საქართველოს ეროვნული გმირის წოდება მიენიჭა.