იდეიდან რეალურ სტარტაპამდე – მასტერკლასი სტუ-ში

1 აპრილს, საქართველოს ტექნიკურ უნივერსიტეტში, ტექნოლოგიებისა და საგრანტო პროექტების ოფისის ორგანიზებით, მასტერკლასი – „როგორ ვაქციოთ იდეა რეალურ სტარტაპად” ჩატარდა.

ღონისძიებას სფეროს აღიარებული ექსპერტი შალვა ოთანაძე უძღვებოდა, რომელმაც მონაწილეებს სტარტაპის შექმნისა და განვითარების პრაქტიკული ასპექტები გაუზიარა. საუბარი შეეხო სამეწარმეო აზროვნების ჩამოყალიბებას, იდეების დამუშავებასა და ბაზარზე მათ სწრაფ ვალიდაციას. შეხვედრა მაღალი აქტივობით გამოირჩეოდა.

სტანდარტული ლექციური ფორმატის ნაცვლად, პროცესი კითხვა-პასუხის და დებატების რეჟიმში წარიმართა. აუდიტორიას შესაძლებლობა ჰქონდა, ექსპერტთან ერთად განეხილა საკუთარი ინიციატივები, მიეღო კრიტიკული უკუკავშირი და იმ გამოწვევებზე ემსჯელა, რომლებსაც დამწყები მეწარმეები თანამედროვე ბაზარზე აწყდებიან. თეორიულ ნაწილთან ერთად, მასტერკლასი პრაქტიკულ სამუშაოებს მოიცავდა, სადაც მონაწილეებმა რეალურ ქეისებზე დაყრდნობით ბიზნეს-მოდელირებაში სავარჯიშოები შეასრულეს.

ღონისძიება ტექნოლოგიებისა და საგრანტო პროექტების ოფისის ხელმძღვანელმა, გიორგი მიქიაშვილმა შეაჯამა. „ძალიან კარგია, რომ მსგავსი ფორმატის შეხვედრა ჩატარდა, რომელიც არა მხოლოდ სტუდენტებისთვის, არამედ ყველა დაინტერესებული პირისთვის იყო ხელმისაწვდომი. ტექნოლოგიებისა და საგრანტო პროექტების ოფისი მაქსიმალურად შეუწყობს ხელს მსგავს ინიციატივებს, რადგან ჩვენი მიზანია ინოვაციების მხარდაჭერა და საჭირო პლატფორმების შექმნა.“ – განაცხადა გიორგი მიქიაშვილმა.