სტუ-ში მასშტაბური ინიციატივის – „ინოვაციური იდეების კონკურსი – მომავლის პროექტები“ – ფარგლებში 10 გამარჯვებული სტუდენტური იდეა გამოავლინეს

საქართველოს ტექნიკურ უნივერსიტეტში, სტუდენტებსა და კურსდამთავრებულებს შორის ინოვაციური იდეების გენერაციისა და მათი პრაქტიკული რეალიზების ხელშეწყობის მიზნით 2025 წლის მანძილზე განხორციელებული მასშტაბური საუნივერსიტეტო ინიციატივის – „ინოვაციური იდეების კონკურსი – მომავლის პროექტები“ – ფარგლებში 10 გამარჯვებული სტუდენტური იდეა გამოავლინეს.

„ინოვაციური იდეების კონკურსი – მომავლის პროექტები“ ფინალში გასული 18 სტუდენტური იდეიდან, ჟიურის შეფასებით, გამარჯვებულად 10 საუკეთესო იდეა დასახელდა: ბიოკაფსი / Biocaps; ვერიტას / Veritas; კალმე / Kalme; მეტაკრაფტი / Metacraft; ბაბა ვინდ / BABA WIND; მეიქ ექსჩეინჯ / Make Exchange; – ქართული ჯავშანჟილეტი / Georgian Body Armor; – ჰელიგარდი – უსაფრთხოება ციდან / Heliguard – Security from the sky; ემიგო / EMIGO; ფუდ-ბოქსი / Food-Box.

ღონისძიება, რომელსაც ესწრებოდნენ საქართველოს ტექნიკური უნივერსიტეტის სხვადასხვა ფაკულტეტის დეკანები, პროფესორ-მასწავლებლები და სტუდენტები, სტუ-ის ადმინისტრაციის წარმომადგენლები, კონკურსში მონაწილეები და მათი მენტორები, ასევე ინდუსტრიების წარმომადგენლები და მოწვეული პირები, საქართველოს ტექნიკური უნივერსიტეტის ვიცე-რექტორმა, პროფესორმა თამარ ლომინაძემ გახსნა.

როგორც ვიცე-რექტორმა აღნიშნა, ინიციატივა, რომლის მიზანიც ახალგაზრდებში ინოვაციური პოტენციალის გააქტიურებაა, რამდენიმე ეტაპს მოიცავდა, მათ შორის მრავალკვირიანი ინტენსიური მენტორინგისა და სასწავლო ტრენინგების სერიას უნივერსიტეტის აკადემიური პერსონალისა და ბრიტანელი ექსპერტების მენტორობით.

„მსგავსი ფორმატის კონკურსები უმნიშვნელოვანესი კომპონენტია საუნივერსიტეტო სივრცის, შიდა და გარე ურთიერთობების მდგრადი განვითარებისთვის. პროექტი ხელს უწყობს სტუდენტებისა და კურსდამთავრებულების ინტეგრირებას რეალურ ბიზნესპროცესებში და აძლიერებს კოლაბორაციას აკადემიურ სექტორსა და ინდუსტრიებს შორის რეალურ დროში. აღნიშნულ ინიციატივას მოვიაზრებთ როგორც პლატფორმას, რომელიც მნიშვნელოვნად აჩქარებს ახალგაზრდების პროფესიულ და კარიერულ წინსვლას. მნიშვნელოვანია, რომ ეს ინიციატივა პასუხობს თანამედროვე საგანმანათლებლო ტენდენციებს და ხელს უწყობს საქართველოს ტექნიკური უნივერსიტეტის ჩამოყალიბებას სამეცნიერო და პრაქტიკული ინოვაციების ცენტრად. საქართველოს ტექნიკური უნივერსიტეტისა და რექტორის, აკადემიკოს დავით გურგენიძის სახელით, ვულოცავთ გამარჯვებული იდეების ავტორებს, ინოვაციური იდეების კონკურსის მონაწილე ყველა სტუდენტსა და მათ მენტორებს – ვფიქრობთ, სამომავლო პერსპექტივების გათვალისწინებით, ჩვენმა ახალგაზრდებმა საუნივერსიტეტო სივრცეში ძალიან საჭირო და მრავლისმომცველი გამოცდილება შეიძინეს“, – აღნიშნა პროფესორმა თამარ ლომინაძემ.

გამარჯვებული იდეების ავტორებსა და ინოვაციური იდეების კონკურსის მონაწილეებს ღონისძიების ორგანიზატორებმა სერტიფიკატები გადასცეს, ხოლო პარტნიორმა ორგანიზაციებმა – წამყვანმა კომპანიებმა: „ჰანიველი“, „ბაუმერი“, „ავტოტექნო“, „ავტობანი“, „მინა“, „სანტე-ლაქტალისი“ – თავიანთი ფავორიტი გუნდები სხვადასხვა ფასეული საჩუქრით დააჯილდოვეს.

ღონისძიების ორგანიზატორების განცხადებით, გამარჯვებული პროექტები, პროფესორ-მასწავლებლებთან კონსულტაციების გზით, საუნივერსიტეტო პროგრამის ფარგლებში აქსელერაციის და ინკუბაციის ეტაპებს გაივლიან. როგორც ორგანიზატორები აღნიშნავენ, საუნივერსიტეტო ინიციატივის მიზანი სტუდენტებს, კურსდამთავრებულებსა და ახალგაზრდა თანამშრომლებს შორის სამეწარმეო გამოცდილების გაზიარება, მათი უნარების განვითარება და ახალი ბიზნესების ამოქმედების ხელშეწყობა, რაც ასევე სტიმულს მისცემს საქართველოს ტექნიკურ უნივერსიტეტსა და ინდუსტრიებს შორის მჭიდრო პარტნიორობას. მათი თქმით, მნიშვნელოვანია, რომ საუნივერსიტეტო სივრცეში სამეწარმეო ეკოსისტემის განვითარება სულ უფრო მეტად ეფუძნება სტუდენტთა იდეების სისტემურ მხარდაჭერას, ხოლო აღნიშნულ პროცესში განსაკუთრებული მნიშვნელობა ენიჭება იმ პროგრამებს, რომლებიც სტუდენტებს უქმნის შესაძლებლობას, სტრუქტურირებული ცოდნა, აკადემიური და პრაქტიკული მხარდაჭერა იდეის ჩამოყალიბებისა და დახვეწის ფაზაშივე მიიღონ.

„ინოვაციური იდეების კონკურსი – მომავლის პროექტები“ ჩატარდა სტუ-ის ვიცე-რექტორთან კოორდინაციით, ტექნოლოგიებისა და საგრანტო პროექტების საუნივერისტეტო ოფისისა და საუნივერსიტეტო ცენტრის – „ერთად“ ჩართულობით.

კონკურსის მთავარი პარტნიორი იყო სტუ-ის სტუდენტური სერვისების, სპორტისა და კულტურის დეპარტამენტი, ხოლო აკადემიური მხარდაჭერა, ბრიტანელ ექსპერტებთან ერთად, სტუ-ის სამეწარმეო მენეჯმენტის საგანმანათლებლო პროგრამის აკადემიურმა გუნდმა უზრუნველყო.