ბილიარდის შიდა ტურნირი სტუ-ში

საქართველოს ტექნიკურ უნივერსიტეტში, 13-ვე ფაკულტეტის სტუდენტებს შორის ბილიარდის სახეობაში, „pool“ ფორმატში, საუნივერსიტეტო ტურნირი იმართება, რომელიც მიმდინარე წლის 26 მარტის ჩათვლით გაგრძელდება. 

საუნივერსიტეტო ტურნირის ორგანიზატორია სტუდენტური სერვისების, კულტურისა და სპორტის დეპარტამენტი, მხარდამჭერი კი – საბილიარდო „უნივერსი“. სპორტული ღონისძიების მიზანია სტუდენტებში ჯანსაღი ცხოვრების წესის პოპულარიზაცია, ასევე, სხვადასხვა სპორტულ აქტივობებში ჩართულობით, ახალგაზრდებს შორის მეგობრობის გაღრმავება და გუნდური უნარების განვითარება.

სტუ-ის სტუდენტური სერვისების, კულტურისა და სპორტის დეპარტამენტის ხელმძღვანელის ლევან ფიფიას განცხადებით, ტურნირის ფორმატი მაქსიმალურად უზრუნველყოფს სტუდენტთა მონაწილეობას შეჯიბრებაში, უღვივებს ასპარეზობის მოტივაციას, აძლევს მათ საშუალებას, მაქსიმალურად გამოავლინონ სპორტული უნარები და კონკურენტულობა. მისი თქმით, პირველ ეტაპზე, თითოეულ ფაკულტეტზე იმართება მატჩების სერია, რომელიც საუკეთესო საფაკულტეტო მოთამაშეებს გამოავლენს. 

„მსგავსი სპორტული ინიციატივებითა და აქტივობებით, საქართველოს ტექნიკური უნივერსიტეტის ადმინისტრაცია და პირადად რექტორი, აკადემიკოსი დავით გურგენიძე მიზნად ისახავს სტუდენტური ცხოვრების გამრავალფეროვნებას და ახალგაზრდების მოტივაციის ამაღლებას. დარწმუნებული ვართ, რომ ტურნირში მონაწილეობა დადებითად აისახება როგორც სტუდენტთა პიროვნული თვისებების გამოვლენაზე, ისე მათ აკადემიურ წარმატებებზე“, – აღნიშნავს ლევან ფიფია.

სტუდენტური სერვისების, კულტურისა და სპორტის დეპარტამენტის სპორტის მიმართულების ხელმძღვანელის, არჩილ იოსელიანის ინფორმაციით, ბილიარდის საუნივერსიტეტო ტურნირის გამარჯვებული გუნდი, სამომავლოდ, სხვადასხვა გარე ტურნირებში საქართველოს ტექნიკური უნივერსიტეტის სახელით იასპარეზებს, მათ შორის უნივერსიადასა და ახალგაზრდულ ფესტივალზე.

როგორც ის აღნიშნავს, სტუ-ის ადმინისტრაციის მხარდაჭერით, უახლოეს მომავალში იგეგმება შიდა ტურნირების ორგანიზება სხვადასხვა სახეობებში, მათ შორის: ბოულინგში, მაგიდის ჩოგბურთში, კალათბურთში, ფუტსალსა და ფრენბურთში.

„გაზაფხულის დადგომასთან ერთად, უნივერსიტეტი გადადის სპორტული აქტივობის ფაზაში. ბილიარდში შეჯიბრება დიდი აქტიურობით დაიწყო და სტუდენტებში ფართო ინტერესი გამოიწვია, რაც აქედანვე მიუთითებს ტურნირის წარმატებაზე. მნიშვნელოვანია, რომ გამარჯვებულებს შესაძლებლობა ექნებათ, უნივერსიტეტის სახელით მონაწილეობა მიიღონ მომავალ უნივერსიადასა და ახალგაზრდულ ფესტივალში. ყველა მონაწილეს წარმატებებს ვუსურვებთ”, – ამბობს არჩილ იოსელიანი.

საქართველოს ტექნიკური უნივერსიტეტი მოუწოდებს სტუდენტებს, შეუერთდნენ სპორტულ ღონისძიებას, თავიანთ საფაკულტეტო გუნდებს უქომაგონ და მათთან ერთად გაიზიარონ გამარჯვების სიხარული.