სტუ-ის დელეგაცია ეკონომიკის სამეცნიერო კვლევითი ინსტიტუტის (ESRI) 60 წლის იუბილესადმი მიძღვნილ კონფერენციაში მონაწილეობდა

საქართველოს ტექნიკური უნივერსიტეტის დელეგაციამ კანცლერის, პროფესორ კარლო კოპალიანის ხელმძღვანელობით,  ეკონომიკის სამეცნიერო კვლევითი ინსტიტუტის (ESRI) 60 წლის იუბილესადმი მიძღვნილ საერთაშორისო კონფერენციასა და რიგით მესამე ფორუმში – „ახალი თაობის ეკონომიკა: გამოწვევები და პერსპექტივები” (Next Generation Economics: Challenges and Perspectives – 3rd ECO Think-Tank Forum) მიიღო მონაწილეობა. 

საქართველოს ტექნიკური უნივერსიტეტი, კონფერენციასა და ფორუმზე, კანცლერთან ერთად სტუ-ის სამეცნიერო-კვლევითი ინსტიტუტ ტექინფორმის დირექტორმა, პროფესორმა ნელი მახვილაძემ და მისმა მოადგილემ, პროფესორმა მარიამ რაზმაძემ წარადგინეს. 

პროფესორ კარლო კოპალიანის თქმით, საერთაშორისო კონფერენცია და ფორუმი ორგანიზებული იყო აზერბაიჯანის ეკონომიკის სამინისტროს მიერ და მასში მონაწილეობა, აზიის ქვეყნების წამყვანი უნივერსიტეტების, სამეცნიერო-კვლევითი ცენტრების ხელმძღვანელმა პირებმა, მეცნიერებმა, მკვლევრებმა, საერთო ჯამში 200-ზე მეტი დელეგატმა, მიიღო. 

მისივე თქმით, ფორუმი ეხებოდა ისეთ მნიშვნელოვან თემებს, როგორიცაა, მწვანე ეკონომიკა, მის წინაშე მდგარი გამოწვევები, გაციფრულების საკითხები,ინფრასტრუქტურას და მომავალი თაობის ეკონომიკის გამოწვევები და მდგრადობა, ეროვნული სტრატეგიების და გზამკვლევების შექმნის საკითხები.
 
„დღეს სამეცნიერო და ტექნიკური ინფორმაციის (STI) მნიშვნელობა დიდ გავლენას ახდენს საგანმანათლებლო და სამეცნიერო პროცესების მდგრად განვითარებაზე და მნიშვნელოვანი წვლილი შეაქვს თანამედროვე ცოდნაზე დაფუძნებულ საზოგადოების ფორმირებაში. სამეცნიერო და ტექნიკური ინფორმაცია (STI) წარმოადგენს ინოვაციების მყარ საფუძველს, რაც უზრუნველყოფს სასწავლო დაწესებულებებისა და სამეცნიერო-კვლევითი ორგანიზაციების შესაძლებლობას, შეინარჩუნონ ლიდერობა ტექნოლოგიურ პროგრესსა და მსოფლიო საუკეთესო გამოცდილების ათვისებაში.

საქართველოს ტექნიკური უნივერისიტეტის ინსტიტუტი „ტექინფორმი“ სამეცნიერო და ტექნიკური ინფორმაციის (STI) გავრცელების სფეროში საქართველოს წამყვანი ორგანიზაციაა და წარმოადგენს შესანიშნავ მაგალითს იმისა, თუ როგორ შეუძლია თანმიმდევრულ, სტრუქტურირებულ ხელმისაწვდომობასა და სამეცნიერო ცოდნის მიზანმიმართულ გამოყენებას ხელი შეუწყოს ჩვენი ქვეყნის აკადემიური და კვლევითი ეკოსისტემის მდგრად განვითარებას”, – განაცხადა კარლო კოპალიანმა. 

ინსტიტუტ ტექინფორმის დირექტორის მოადგილის, პროფესორ მარიამ რაზმაძის თქმით, ფორუმზე საქართველოს ტექნიკური უნივერსიტეტის დელეგაციის წევრებმა საქართველოს სამეცნიერო – ტექნიკური ინფორმაციის როლზე და სამეცნიერო ეკოსისტემის მდგრადი განვითარების პროცესში მის მნიშვნელობაზე ისაუბრეს. 

„ფორუმში – “ახალი თაობის ეკონომიკა: გამოწვევები და პერსპექტივები – ECO Think-Tank Forum,” საქართველოს ტექნიკური უნივერსიტეტის მონაწილეობა ძალზედ მნიშვნელოვანი და სასარგებლო აღმოჩნდა.

ერთის მხრივ, როგორც პანელური დისკუსიის მონაწილეებს, გვქონდა შესაძლებლობა ჩავრთულიყავით ღია დისკუსიაში, რომელიც ეხებოდა მსოფლიოს მდგრადი განვითარების მიზნებთან დაკავშირებულ გამოწვევებსა და მათი მიღწევის სტრატეგიებს სხვადასხვა ქვეყნების მაგალითზე. მეორეს მხრივ, საუკუნოვანი ისტორიის მქონე უნივერსიტეტისა და ჩვენი ქვეყნის მაგალითზე გავუზიარეთ უნივერსიტეტისა და ინსტიტუტ ტექინფორმის გამოცდილება და მათი გავლენა სამეცნიერო-საგანმანათლებლო ეკოსისტემის ფორმირებაზე. ფორუმის შედეგად დამყარდა ახალი პარტნიორული ურთიერთობები და დაისახა სამომავლო თანამშრომლობის გეგმები აზერბაიჯანის ეკონომიკის სამინისტროს დაქვემდებარებაში მყოფი და ჩინეთის სამეცნიერო-კვლევით დაწესებულებებთან”, – აცხადებს მარიამ რაზმაძე.