სტუ-ის დოქტორანტების კვლევითმა პროექტებმა რუთაველის ეროვნული სამეცნიერო ფონდის დაფინანსება მოიპოვა

საქართველოს ტექნიკური უნივერსიტეტის სამშენებლო ფაკულტეტის დოქტორანტების კვლევითმა პროექტებმა შოთა რუსთაველის საქართველოს ეროვნული სამეცნიერო ფონდის 2024 წლის დოქტორანტურის საგანმანათლებლო პროგრამების დაფინანსების კონკურსში გამარჯვება მოიპოვეს. 

კონკურსში გამარჯვებული სამი პროექტის ავტორები მშენებლობის სადოქტორო პროგრამის სტუდენტი ქეთევან წიქარიშვილი და წყლის რესურსების ინჟინერიის სადოქტორო პროგრამის სტუდენტები – მარიამ ყავრელიშვილი და  ლაშა ყაველაშვილი არიან.

სამშენებლო ფაკულტეტის დეკანის, პროფესორ ზურაბ გვიშიანის განცხადებით, რუსთაველის ეროვნული სამეცნიერო ფონდის დოქტორანტურის საგანმანათლებლო პროგრამების დაფინანსების წლევანდელ კონკურსში საქართველოს ტექნიკური უნივერსიტეტის დოქტორანტების მიერ მოპოვებული გამარჯვება ზრდის, როგორც უნივერსიტეტის ახალგაზრდა მეცნიერთა დაინტერესებას აქტიურად ჩაერთონ სხვადასხვა კონკურსებში, ასევე, საერთაშორისო კვლევით პროექტებში მათი ინტეგრირების შესაძლებლობებს. 

„სასიხარულოა, რომ სამშენებლო ფაკულტეტის სამმა დოქტორანტმა რუსთაველის ფონდის მიერ გამოცხადებულ კონკურსში მაღალ დონეზე შესრულებული სამი სამეცნიერო პროექტი წარადგინა და გამარჯვება მოიპოვა. ეს ჩვენი ნიჭიერი ახალგაზრდების და მათთან ერთად, საქართველოს ტექნიკური უნივერსიტეტისა და მისი სამშენებლო ფაკულტეტის პროფესორ-მასწავლებელთა დიდი წარმატებაა.

ვულოცავთ ახალგაზრდებს და გვჯერა, სამეცნიერო მიმართულებით, ისინი მომავალშიც არაერთ მნიშვნელოვან შედეგს მიაღწევენ.

მშენებლობის სადოქტორო პროგრამის სტუდენტმა, ქეთევან წიქარიშვილმა, პროფესორ მარინა ჯავახიშვილის ხელმძღვანელობით, წარადგინა სრულყოფილად არგუმენტირებული საკონკურსო პროექტი – „შენობების რეკონსტრუქციის მიზანშეწონილობისა და ეფექტურობის კვლევა“.

რაც შეეხება წყლის რესურსების ინჟინერიის სადოქტორო პროგრამის სტუდენტ ლაშა ყაველაშვილს, ასოცირებულ პროფესორ ზაალ ცინაძის მენტორობით, განახორციელა პროექტი – „საქართველოს რეგიონების უწყვეტი წყალმომარაგების ოპერირების მეთოდოლოგიის შემუშავება”, ხოლო ამავე პროგრამის დოქტორანტის, მარიამ ყავრელიშვილის საკონკურსო პროექტი – „სასმელ-სამეურნეო დანიშნულების წყლის მედიკამენტოზური დაბინძურების კვლევა თანამედროვე პროგრამული უზრუნველყოფის მეშვეობით”, ჩემი ხელმძღვანელობით შემუშავდა.

უნივერსიტეტი, რექტორის, აკადემიკოს დავით გურგენიძის თაოსნობით, მეცნიერებით დაინტერესებულ ახალგაზრდებს მრავალმხრივ უწყობს ხელს, ეფექტიანად მიიღონ მონაწილეობა როგორც ადგილობრივ, ასევე, საერთაშორისო კვლევით კონკურსებში. ვფიქრობთ, ეს ერთ-ერთი საუკეთესო გზაა უმაღლესი განათლებისა და მეცნიერების ხარისხის ასამაღლებლად, მკვლევართა ახალგაზრდა, ნიჭიერი თაობის გამოსავლენად. საბოლოო ჯამში, სწორედ ეს პროცესი უზრუნველყოფს საერთაშორისო სივრცეში ახალგაზრდა მეცნიერთა სრულფასოვან ინტეგრირებას“, – აღნიშნავს ზურაბ გვიშიანი.  

ცნობისათვის, შოთა რუსთაველის საქართველოს ეროვნულმა სამეცნიერო ფონდმა „2024 წლის დოქტორანტურის საგანმანათლებლო პროგრამების დაფინანსების კონკურსში“ 39 გამარჯვებული პროექტი გამოავლინა.