სტუ-ის მეცნიერები Erasmus+ ოფისის თანამშრომლებს შეხვდნენ

საქართველოს ტექნიკური უნივერსიტეტში, Erasmus K2 პროგრამის ფარგლებში, საინფორმაციო შეხვედრა გაიმართა, სადაც სპიკერებმა მარიამ სულაშვილმა და გიორგი მჭედლიძემ საუნივერსიტეტო საზოგადოებას უნივერსიტეტის კვლევითი ტრანსფერისა და უნივერსიტეტსა და ინდუსტრიას შორის თანამშრომლობის მეშვეობით შესაძლებლობების გაზრდის შესახებ განახლებული ცნობები მიაწოდეს. 

სტუ-ის ტექნოლოგიებისა და საგრანტო პროექტების ოფისის ხელმძღვანელის გიორგი მიქიაშვილის თქმით, Erasmus+ -ის ოფისის თანამშრომლებთან საქართველოს ტექნიკური უნივერსიტეტის მეცნიერებისა და მკვლევრების შეხვედრის მიზანია, ქართული და ევროპული საგანმანათლებლო ინსტიტუციებსა და ორგანიზაციებს შორის, თანამშრომლობითი გარემოს ხელშეწყობა, რაც მომავალში მათ დაეხმარებათ, Erasmus+-ის პროგრამის ფარგლებში, კონსორციუმის შედგენასა და პარტნიორების მოძიებაში.

„პროექტის მიზანია საქართველოს უნივერსიტეტების კვლევითი გარემოს განახლება სამიზნე უნივერსიტეტებში კვლევისა და განვითარების ერთეულების განვითარების გზით. აღნიშნული მიზნის მისაღწევად უკვე მოქმედებს ერთობლივი კვლევითი პლატფორმა, რომელიც ხელს უწყობს მიზნობრივ უნივერსიტეტებში, მათ შორის, საქართველოს ტექნიკურ უნივერსიტეტში, კვლევითი აქტივობების დაგეგმვას, დანერგვასა და შეფასებას.

მორიგი საინფორმაციო შეხვედრა, ჩვენი მეცნიერებისა და მკვლევრებისთვის არის ახალი კონტაქტების მოძიების, ახალი კვლევების ჩატარებისა და მონაცემთა ანალიზისთვის აუცილებელი და საჭირო. Erasmus K2-ის პროგრამის ფარგლებში ხორციელდება როგორც საქართველოს ტექნიკური უნივერსიტეტისთვის, ასევე, ჩვენი ქვეყნისთვის მნიშვნელოვანი პროექტები.

დღევანდელ შეხვედრას 13-ვე ფაკულტეტის მეცნიერ-თანამშრომლები ესწრებოდნენ. მათ, ასევე, აქვთ შესაძლებლობა, ინფორმაციის დასაზუსტებლად მომართონ ჩვენს ოფისს. დარწმუნებული ვარ, უნივერსიტეტი ნოემბრიდან, თებერვლის ჩათვლით პერიოდს ნაყოფიერად გამოიყენებს და ჩვენი მეცნიერები არაერთ საინტერესო და მნიშვნელოვან პროექტში ჩაერთვებიან. წარმატებებს ვუსურვებ მათ”, – აცხადებს გიორგი მიქიაშვილი.

შეხვედრის დასასრულს,  Erasmus+-ის ოფისის წარმომადგენლებმა შეკითხვებს უპასუხეს.