სტუ-ის რექტორმა MIFP-ის მეცნიერებთან ფიზიკის საერთაშორისო სკოლის დაფუძნების შესახებ იმსჯელა

საქართველოს ტექნიკური უნივერსიტეტის რექტორი, აკადემიკოსი დავით გურგენიძე სტუ-ში მიმდინარე საერთაშორისო სამეცნიერო კონფერენციის – „სინათლისა და მატერიის შეკავშირების ფიზიკა ნანოსტრუქტურებში – PLMCN 24“ (International Conference on Physics of Light-Matter Coupling in Nanostructures) ორგანიზატორს, უნივერსიტეტის პარტნიორი ინსტიტუტის წარმომადგენლებს – ფუნდამენტური ფიზიკის ხმელთაშუა ზღვის ინსტიტუტის (MIFP – რომი, იტალია) პრეზიდენტს, დოქტორ ჯუზეპე ერამოს, სამეცნიერო დირექტორს, ვესტლეიკის უნივერსიტეტის (ჩინეთი) პროფესორს, ალექსეი კავოკინს და კემბრიჯის უნივერსიტეტის (გაერთიანებული სამეფო) ფიზიკის დეპარტამენტის პროფესორს, ჯერემი ბაუმბერგს შეხვდა.

შეხვედრაში სტუ-ის სამეთვალყურეო საბჭოს პრეზიდენტი, პროფესორი ზურაბ გუდავაძე, ვიცე-რექტორი, ასოცირებული პროფესორი თამარ წერეთელი, რექტორის მოადგილე მეცნიერების დარგში, პროფესორი თამარ ლომინაძე, ინფორმატიკისა და მართვის სისტემების ფაკულტეტის დეკანის მოვალეობის შემსრულებელი, პროფესორი თალიკო ჟვანია, ასევე, უნივერსიტეტის ადმინისტრაციის წარმომადგენლები  მონაწილეობდნენ.

შეხვედრაზე მხარეებმა, სამომავლო კოლაბორაციასთან დაკავშირებულ საკითხებთან ერთად, ფიზიკის რეგულარული საერთაშორისო სკოლის დაფუძნების თაობაზე საქართველოს ტექნიკური უნივერსიტეტის რექტორის ინიციატივაზე იმსჯელეს.

როგორც რექტორმა აღნიშნა, ფიზიკის რეგულარულმა საერთაშორისო სკოლამ, რომელსაც მოქნილი სტრუქტურა და თანამედროვე სტანდარტის შესაბამისი ორგანიზაციული მოწყობა ექნება, საქმიანობა ფიზიკის ყველა მიმართულებით უნდა განახორციელოს და მოიცვას ფილოსოფია, ასევე, ფიზიკის მომიჯნავე საბუნებისმეტყველო მეცნიერებები. დავით გურგენიძის განცხადებით, ფიზიკის საერთაშორისო სკოლის დაფუძნების იდეა ემყარება სურვილს, ახალგაზრდა მკვლევრებს მიეცეთ შესაძლებლობა ფიზიკის დარგში მიმდინარე უახლესი კვლევების შესახებ მიიღონ ამომწურავი ინფორმაცია, სამეცნიერო კონსულტაციები, მოისმინონ საჯარო ლექციები მსოფლიოს ცნობილი ფიზიკოსებისგან, ფილოსოფოსებისა და ფიზიკის მომიჯნავე დარგებში მოღვაწე მეცნიერ-მკვლევრებისგან, ასევე, თავისუფალ ფორმატში გამართონ დიალოგი და დისკუსიები. როგორც დავით გურგენიძემ აღნიშნა, ფიზიკის საერთაშორისო სკოლა ახალგაზრდა მეცნიერთათვის მოიაზრება, როგორც ფუნდამენტური კვლევების პროცესში მნიშვნელოვანი დამხმარე რგოლი.

„დიდი სურვილი გვაქვს, შეიქმნას საერთაშორისო სკოლა, რომელიც გააერთიანებს ფიზიკის მიმართულებებს, ფილოსოფიას და ფიზიკის მომიჯნავე მეცნიერებებს, რადგან მსოფლიო აწყობილია ფიზიკის დარგში კვლევებზე, ფილოსოფია კი ყველა მეცნიერებაშია შეჭრილი. ცხადია, პირველ რიგში, ჩვენი ქვეყნის ნიჭიერ და იმედისმომცემ ახალგაზრდებზე ვფიქრობთ, მაგრამ აქვე აღვნიშნავთ, რომ სკოლა კარს ასევე გაუღებს სხვადასხვა ქვეყნის ახალგაზრდა მკვლევრებს. ნიჭიერ ახალგაზრდებს ექნებათ შესაძლებლობა, პირადად შეხვდნენ დიდ მეცნიერებს. გთავაზობთ, საქართველოს ტექნიკურ უნივერსიტეტთან პარტნიორობით, MIFP-ი ფიზიკის საერთაშორისო სკოლის თანადამფუძნებელი გახდეს. ასევე, გთავაზობთ, ამ იდეის ირგვლივ ერთობლივი ძალებით მოვიზიდოთ, როგორც საქართველოში აკრედიტებული უნივერსიტეტები და სამეცნიერო-კვლევითი ინსტიტუტები, ასევე, ფიზიკის დარგში მოქმედი მსხვილი საერთაშორისო ორგანიზაციები და კვლევითი ცენტრები – ეს სჭირდება ჩვენი პლანეტის საერთო მომავალს, მეცნიერთა ახალგაზრდა თაობებს“, – აღნიშნა შეხვედრაზე რექტორმა, დავით გურგენიძემ.

შეხვედრაზე მოსაზრებების შეჯერების შედეგად, ფიზიკის რეგულარული საერთაშორისო სკოლის დაფუძნების ადგილად მხარეები საქართველოს განიხილავენ. მათივე მოსაზრებით, საერთაშორისო სკოლის შეკრებების გეოგრაფიული არეალი ვრცელი იქნება და მსოფლიოს სხვადასხვა ქალაქებს მოიცავს.