სტუ-ის რექტორმა, სტუდენტებმა და პროფესორ-მასწავლებლებმა საქართველოს ტერიტორიული მთლიანობისთვის დაღუპულთა ხსოვნას პატივი მიაგეს

საქართველოს ტექნიკური უნივერსიტეტის რექტორმა, აკადემიკოსმა დავით გურგენიძემ, ფაკულტეტების დეკანებმა, პროფესორ-მასწავლებლებმა და სტუდენტებმა საქართველოს ტერიტორიული მთლიანობისთვის დაღუპულთა ხსოვნას პატივი მიაგეს და 1993 წლის 27 სექტემბერს აფხაზეთში განვითარებული ტრაგიკული მოვლენების 31 წლისთავზე გმირთა მემორიალი და სახელოვანი კურსდამთავრებულის, საქართველოს ეროვნული გმირის, ჟიული შარტავას ბიუსტი გვირგვინებით შეამკეს.  

საქართველოს ტექნიკური უნივერსიტეტის რექტორის განაცხადებით, სოხუმის დაცემის დღე 31 წლის შემდეგაც საქართველოს ისტორიის უმძიმეს მოვლენად რჩება, თუმცა, ამავდროულად, საქართველოს მშვიდობიანი გაერთიანების იმედით აღგვავსებს.

„31 წელი გავიდა იმ ავადსახსენებელი მოვლენებიდან. მას შემდეგ ეს დღე მძაფრი ტკივილით და უზომო სევდით გვავსებს – შეგვახსენებს სოხუმის დაცემას, დაკარგულ ტერიტორიებს. ამ ტრაგიკულ დღეს პატივს მივაგებთ სამშობლოსთვის გულანთებულ მებრძოლებს, რომლებმაც საქართველოს ტერიტორიულ მთლიანობას სიცოცხლე შესწირეს. მათ შორის იყვნენ საქართველოს ტექნიკური უნივერსიტეტის სტუდენტები, პროფესორ-მასწავლებლები, კურსდამთავრებულები.

დამოუკიდებელი საქართველოს ისტორიაში პირველი ეროვნული გმირი ჟიული შარტავა ჩვენი უნივერსიტეტის სახელოვანი კურსდამთავრებულია. გმირების ხსოვნა ისტორიამ უკვდავყო.

არასოდეს დავივიწყებთ საკუთარ ქვეყანაში განსაცდელის პირისპირ დარჩენილ ასიათასობით დევნილის ადამიანურ ტრაგედიებს. ეს დღე არასოდეს წარიშლება ჩვენი მეხსიერებიდან. 

გაეროს უშიშროების საბჭოს შეხვედრაზე მსოფლიო ლიდერების წინაშე სიტყვით გამოსვლისას საქართველოს პრემიერ-მინისტრმა გაახმოვანა ჩვენი ქვეყნის თითოეული მოქალაქის სანუკვარი ოცნება და საერთო მიზანი: „ჩვენი ერთ-ერთი უმთავრესი ეროვნული ამოცანა არის საქართველოს ტერიტორიული მთლიანობის აღდგენა და რა თქმა უნდა, გაერო-ს გენერალური ასამბლეის 79-ე სესიის პლატფორმა გამოვიყენეთ ამ თემაზე სასაუბროდ.

ჩვენ მივმართეთ ჩვენს დებსა და ძმებს, რომლებიც ცხოვრობენ საოკუპაციო ხაზს მიღმა და ჩვენი მთავარი მოწოდება არის ის, რომ ჩვენ გვინდა ვიცხოვროთ ერთიან, მშვიდობიან, განვითარებულ საქართველოში და ეს გზავნილი კიდევ ერთხელ ხმამაღლა უნდა გავიმეოროთ.

ჩვენი ამოცანაა, მშვიდობიანი გზით საქართველოს ტერიტორიული მთლიანობის აღდგენა და გზა ამ მიმართულებით, რა თქმა უნდა, ურთიერთპატიებასა და ურთიერთშერიგებაზე გადის“.

სწორედ ამ სანუკვარი მიზნის სისრულეში მოსაყვანად, აფხაზეთიდან შორს და აფხაზეთში გაზრდილ თაობებთან ერთად, ნაბიჯ-ნაბიჯ უნდა ვიაროთ შერიგების, ისტორიული სამართლიანობის აღდგენისა და საქართველოს ტერიტორიული გაერთიანებისკენ, ვიშრომოთ, ვისწავლოთ და აღვზარდოთ ღირსეული ახალი თაობები, რათა შევდგეთ ეკონომიკურად ძლიერ სახელმწიფოდ“, – აღნიშნა საქართველოს ტექნიკური უნივერსიტეტის რექტორმა, დავით გურგენიძემ.