სტუ-ში საერთაშორისო სტუდენტებთან შეხვედრების ციკლი სამართლისა და საერთაშორისო ურთიერთობების ფაკულტეტიდან დაიწყო

საქართველოს ტექნიკურ უნივერსიტეტში, სამართლისა და საერთაშორისო ურთიერთობების ფაკულტეტზე 2025/2026 აკადემიურ წელს ჩარიცხულ პირველკურსელ საერთაშორისო სტუდენტებთან გეგმიური გაერთიანებული შეხვედრა გაიმართა, რომლის მიზანი სასწავლო ცხოვრებაში მათი ინტეგრაციის შეუფერხებლად წარმართვის, უნივერსიტეტის აკადემიურ გარემოსთან, საგანმანათლებლო პროგრამებთან და სასწავლო-კვლევით პროცედურებთან ადაპტირების, ასევე, ადმინისტრაციული სერვისების ხელმისაწვდომობის ხარისხის შესახებ დეტალური ინფორმაციის მიღება იყო.

ღონისძიება სტუ-ის საერთაშორისო ურთიერთობების დეპარტამენტის საერთაშორისო სტუდენტთა რეკრუტინგისა და მათი უნივერსიტეტის აკადემიურ და საზოგადოებრივ ცხოვრებაში ინტეგრაციის კოორდინატორმა გახსნა. ლელა ჩიქოვანმა სტუდენტებს დამატებითი ინფორმაცია მიაწოდა ფაკულტეტის საგანმანათლებლო, პრაქტიკულ და ლაბორატორიულ შესაძლებლობებზე, ასევე, მიმდინარე საერთაშორისო პროექტებსა და კვლევით ინფრასტრუქტურაზე.

„ჩვენთვის მნიშვნელოვანია ის, რომ თითოეულ საერთაშორისო სტუდენტს შევუქმნათ მხარდაჭერილი და კომფორტული სასწავლო გარემო. საქართველოს ტექნიკური უნივერსიტეტი გთავაზობთ მაღალ აკადემიურ სტანდარტებზე დაფუძნებულ განათლებას, მრავალფეროვან საუნივერსიტეტო სივრცეს და პერსპექტივებს, რომლებიც თქვენს მომავალ პროფესიულ განვითარებას შეუწყობს ხელს. დარწმუნებული ვარ, აქ მიიღებთ ცოდნასა და გამოცდილებას, რომელიც კარიერული წარმატების მყარ საფუძველს შექმნის,“ – განაცხადა ლელა ჩიქოვანმა.

შეხვედრა ინტერაქტიული ფორმატით წარიმართა, სტუდენტებმა ლელა ჩიქოვანს დამატებითი კითხვებით მიმართეს სასწავლო გრაფიკის, ადმინისტრაციული პროცედურების და სხვადასხვა სტუდენტური სერვისის შესახებ.

ღონისძიება ფაკულტეტის სივრცეების მოკლე ტურით დასრულდა. სტუდენტებმა ლაბორატორიები, საფაკულტეტო ბიბლიოთეკა და სტუდენტებისთვის განკუთვნილი ინფრასტრუქტურა დაათვალიერეს, რაც მათ საშუალებას მისცემს უკეთ გაიცნონ საქართველოს ტექნიკური უნივერსიტეტის აკადემიური და ტექნიკური შესაძლებლობები.

ცნობისთვის, საქართველოს ტექნიკური უნივერსიტეტი აგრძელებს საერთაშორისო სტუდენტთა შეხვედრების სერიას სხვა ფაკულტეტებზეც, რათა ყოველმა სტუდენტმა ადაპტაციის პროცესში უნივერსიტეტისგან მაქსიმალური მხარდაჭერა იგრძნოს.