სტუ-ში ერეკლე მეორის დაბადებიდან 304-ე წლისთავისადმი მიძღვნილი საჯარო ლექცია გაიმართა

საქართველოს ტექნიკური უნივერსიტეტის საინჟინრო ეკონომიკის, მედიატექნოლოგიებისა და სოციალურ მეცნიერებათა ფაკულტეტზე ქართლ-კახეთის მეფის, ერეკლე მეორის მოღვაწეობისადმი მიძღვნილი ღონისძიებების ფარგლებში, მისი დაბადებიდან 304-ე წლისთავი საჯარო ლექციით აღინიშნა. 

საჯარო ლექცია – „ერეკლე მეორე ფრანგი ოფიცრის, შარლ დე გრაი დე ფუას მემუარებში”, რომელიც სტუ-ის ასოცირებულმა პროფესორმა, ისტორიის დოქტორმა ბესიკ გაფრინდაშვილმა გამართა, საინჟინრო ეკონომიკის, მედიატექნოლოგიებისა და სოციალურ მეცნიერებათა ფაკულტეტის დეკანმა გახსნა. როგორც პროფესორმა ივანე ჯაგოდნიშვილმა აღნიშნა, მეფე ერეკლეს ისტორიკოსები შემთხვევით მიიჩნევენ „აღმოსავლეთის ნაპოლეონად”.

მთელი თავისი ხანგრძლივი ცხოვრების განმავლობაში „პატარა კახს” არანაკლებ 500 დიდი და მცირე ბრძოლა აქვს გადატანილი.

„შარლ დე გრაი დე ფუამ, XVIII საუკუნის მეორე ნახევრის ფრანგმა ოფიცერმა, რომელიც რუსეთ-ოსმალეთის ომის (1768-1774) დროს რუსეთის არმიაში კაპიტნად მსახურობდა და გენერალ ტოტლებენის ადიუტანტი იყო, თავის მემუარებში აღწერა იმდროინდელ საქართველოში არსებული ვითარება.

დე გრაი დე ფუა მომსწრე იყო ქართველ-რუსთა ჯარის ოსმალებთან ბრძოლისა აწყურის ციხის აღების დროს. იგი დეტალურად აღწერს საომარი კამპანიის მსვლელობას და, როგორც სამხედრო საქმის მცოდნე, სწორ შეფასებას აძლევს ერეკლე II-ის ტაქტიკას და სტრატეგიას.

აღსანიშნავია, რომ მემუარული ხასიათის რელაცია, რომლის შესახებაც დოქტორი ბესიკ გაფრინდაშვილი ისაუბრებს, 1777–1783 წლებში დაიწერა და იგი ინახებოდა საფრანგეთის საგარეო საქმეთა სამინისტროს არქივში და პირველად, 1954 წელს გამოსცა ინგლისელმა კავკასიოლოგმა დევიდ მარშალ ლენგმა.

იმის გამო, რომ ქართველი ხალხი თვისი არსებობის ისტორიის მანძილზე, სხვადასხვა ჯურის დამპყრობთა წინააღმდეგ გამუდმებით ბრძოლებს აწარმოებდა და მშვიდობიანობის პერიოდები ძალზე ხანმოკლე იყო, ამიტომ ჩვენი სამშობლოს ისტორია ფაქტობრივად ,,ომების ისტორიაა”, როგორც ამას სამართლიანად აღნიშნავენ მეცნიერ-ისტორიკოსები. 

„კახეთის უკანასკნელი დიდი ხელმწიფე”, ერეკლე მეორე კი ერთ-ერთი სახელოვანი მხედართმთავარი. განუწყვეტელმა ომებმა და ამ ომებში გამარჯვებებმა სახელი ევროპაშიც კი იმდენად გაუთქვა, რომ ფრიდრიხ II დიდმა (1712-1786) თქვა: “დასავლეთში მე ვარ და აღმოსავლეთში პრინცი ერეკლე, ქართველთა მეფე”. იმედი მაქვს, საჯარო ლექცია ბევრ, სტუდენტებისათვის ამ დროისთვის პასუხგაუცემელ კითხვებს უპასუხებს”, – აღნიშნა ივანე ჯაგოდნიშვილმა. 

დოქტორმა ბესიკ გაფრინდაშვილმა საჯარო ლექციის ფარგლებში სტუდენტებს, გარდა ფრანგი ოფიცრის, შარლ დე გრაი დე ფუას მემუარებისა, სტუდენტებს საქართველოს ტექნიკური უნივერსიტეტის ეგიდით, მეფე ერეკლე მეორის მოღვაწეობისადმი მიძღვნილი ივანე ჯაგოდნიშვილის საავტორო წიგნი „ერეკლეს ეპოსი” გააცნო, რომელიც დიდი ქართველი მეფის ერეკლე მეორის დაბადებიდან 300 წლისთავისადმი მიძღვნილი ღონისძიებების ფარგლებში, 4 წლის წინ გამოიცა. 

„ერეკლეს ეპოსი” წარმოადგენს ქართული ისტორიის ნაწილს, ქართველი ხალხის მიერ შექმნილი პოეტური ეპოსის ტექსტს და მის თეორიულ -მეცნიერული საფუძვლების შესწავლას.

საჯარო ლექციის დასასრულს, დოქტორმა ბესიკ გაფრინდაშვილმა სტუდენტების კითხვებს უპასუხა.