მეცნიერებისა და ინოვაციების დღე სტუ-ში

საქართველოს ტექნიკურ უნივერსიტეტში, გაეროს სურსათისა და სოფლის მეურნეობის ორგანიზაციის (FAO) ეგიდით, მეცნიერებისა და ინოვაციების დღე ღონისძიებით აღინიშნა.

ღონისძიება-„მწვანე სოფლის მეურნეობა და ინოვაციური მიდგომები: მონაცემებზე დაფუძნებული გადაწყვეტილებები მდგრადი მომავლისათვის” – FAO-სა და საქართველოს ტექნიკური უნივერსიტეტის ინსტიტუტ „ტექინფორმის“ პარტნიორობით, მეცნიერებისა და ინოვაციების კვირეულის ფარგლებში გაიმართა.

ღონისძიებაში მონაწილეობდნენ მეცნიერები, ახალგაზრდა მკვლევრები, აკადემიური წრეები, ახალგაზრდა ლიდერები, სოფლის მეურნეობის დარგში პოლიტიკის განმსაზღვრელი პირები, საქართველოს ტექნიკური უნივერსიტეტისა და სხვადასხვა უმაღლესი სასწავლებლის სტუდენტები, სოფლის მეურნეობის ინდუსტრიის წარმომადგენლები და ექსპერტები. მათ კლიმატის ცვლილებასთან დაკავშირებული გამოწვევების დაძლევის, მომავლის მდგრადი სოფლის მეურნეობის განვითარებისა და დარგში, მეცნიერებისა და ინოვაციის ინტეგრირების გზები განიხილეს, ასევე, აღნიშნულ პროცესებში მომავალი თაობის ჩართულობის გააძლიერების შესაძლებლობებზე იმსჯელეს.

მეცნიერებისა და ინოვაციების დღისადმი მიძღვნილი ღონისძიება საქართველოს ტექნიკური უნივერსიტეტის ვიცე-რექტორმა, პროფესორმა თამარ ლომინაძემ და გაეროს სურსათისა და სოფლის მეურნეობის ორგანიზაციის (FAO) წარმომადგენლის მოადგილემ საქართველოში, მამუკა მესხმა გახსნეს.

ვიცე-რექტორმა ყურადღება გაამახვილა ღონისძიების მნიშვნელობასა და მსგავსი ინიციატივების მხარდაჭერის აუცილებლობაზე. როგორც თამარ ლომინაძემ აღნიშნა, ქვეყანაში მეცნიერების განვითარებისა და ინოვაციების დანერგვის, ასევე ეკონომიკის სხვადასხვა დარგის და მათ შორის სოფლის მეურნეობის მდგრადი განვითარების პროცესში, საქართველოს ტექნიკური უნივერსიტეტის აკადემიური და სამეცნიერო პერსონალის მრავალწლიანი კომპეტენცია და გამოცდილება მნიშვნელოვან როლს ასრულებს.

„საგულისხმო და მნიშვნელოვანია, რომ მეცნიერებისა და ინოვაციების დღე FAO-ს წარმომადგენლობამ საქართველოში ჩვენი უნივერსიტეტის სამეცნიერო-ტექნიკური ინფორმაციის ინსტიტუტ „ტექინფორმთან“ პარტნიორობით ჩაატარა. ეროვნულ დონეზე „ტექინფორმი“ ცოდნის გადაცემისა და გავრცელების ერთ-ერთი საკვანძო ორგანიზაციაა და ჩვენს ქვეყანას 1958 წლიდან წარმოადგენს საერთაშორისო სამეცნიერო, ტექნიკურ და ინოვაციურ ცენტრებსა თუ სამეცნიერო კვლევით ქსელებში; 2020 წლიდან კი, FAO-ს მანდატით, „ტექინფორმი“ სოფლის მეურნეობაში სამეცნიერო სერვისების პოპულარიზაციისა და მხარდაჭერის საკითხებში FAO AGRIS-ის ეროვნული ჰაბია და მნიშვნელოვანი როლი ენიჭება ამ დარგში მეცნიერების მხარდაჭერისა და ცოდნის გავრცელების კუთხით.

ეს ღონისძიება არა მხოლოდ ჩვენი უნივერსიტეტისა და FAO-ს ნაყოფიერი თანამშრომლობის კარგი მაგალითია, არამედ ერთგვარი პლატფორმაც, სადაც სამეცნიერო საზოგადოებას, სახელმწიფო სტრუქტურებს, კერძო სექტორს და ახალგაზრდა თაობას ერთიანდებიან საერთო მიზნის – მდგრადი და კლიმატგონივრული განვითარების – გარშემო. გვჯერა, ეს არის სივრცე, სადაც მონაცემებზე დაფუძნებული გადაწყვეტილებები, ინოვაციური ტექნოლოგიები და ინჟინერიის თანამედროვე მიღწევები რეალურ სასიკეთო შედეგებეს მოგვიტანს.

საქართველოს ტექნიკური უნივერსიტეტი, თავისი მრავალწლიანი აკადემიური და სამეცნიერო გამოცდილებით, მზად არის იყოს ლიდერი არა მხოლოდ ინჟინერიისა და ტექნოლოგიების, არამედ სოფლის მეურნეობის მდგრადი განვითარების პროცესშიც. ჩვენთვის პრიორიტეტულია, რომ ჩვენი სტუდენტები და ახალგაზრდა მკვლევრები გახდნენ ცვლილებების მთავარი მამოძრავებელი ძალა – ისინი, ვინც მონაცემთა ანალიზის, ხელოვნური ინტელექტისა და სხვა ინოვაციური მიდგომების გამოყენებით შექმნიან ახალ მოდელებს, შეძლებენ კლიმატის ცვლილების გამოწვევების ეფექტიანად დაძლევას.

ჩვენ ვხედავთ ჩვენს მისიას იმაში, რომ უნივერსიტეტი იყოს ცოდნისა და ინოვაციის კერა, სადაც აკადემიური თავისუფლება, კვლევითი პოტენციალი და პრაქტიკული გამოცდილება ერთიანდება. დარწმუნებული ვარ, მსგავსი ღონისძიებები ხელს უწყობს არა მხოლოდ პროფესიულ განვითარებას, არამედ ახალი პარტნიორობების ჩამოყალიბებას, საერთაშორისო თანამშრომლობის გაღრმავებას და გლობალური საუკეთესო პრაქტიკის გაზიარებას. სწორედ ამით უნდა შეიქმნას მძლავრი იმპულსი ინოვაციური ხედვების დასანერგად,“ – აღნიშნა თამარ ლომინაძემ.

როგორც გაეროს სურსათისა და სოფლის მეურნეობის ორგანიზაციის (FAO) წარმომადგენლის  მოადგილემ საქართველოში, მამუკა მესხმა აღნიშნა, ღონისძიების მიზანია ისეთ პრიორიტეტულ მიმართულებებზე მსჯელობა, როგორიცაა სოფლის მეურნეობის სექტორში მონაცემთა შეგროვება და გამოყენება, ასევე თანამედროვე ტექნოლოგიების დანერგვა. მისი თქმით, FAO მხარს უჭერს საქართველოს განავითაროს აღნიშნული შესაძლებლობები, ხელს უწყობს პარტნიორობას, რომელიც ახალგაზრდებს, აკადემიურ წრეებსა და ინდუსტრიის სხვა აქტორებს საშუალებას აძლევს ერთობლივად შექმნან ინოვაციური გადაწყვეტები მდგრადი მომავლისთვის.

ღონისძიების მონაწილეებს მიესალმა სტუ-ის სამეცნიერო-ტექნიკური ინფორმაციის ინსტიტუტ „ტექინფორმის“ დირექტორი პროფესორი ნელი მახვილაძე. მან FAO-სთან 27-წლიანი ნაყოფიერი კოლაბორაციის შესახებ ისაუბრა და სოფლის მეურნეობის სერვისების ხელმისაწვდომობის, სამეცნიერო პოტენციალის გაძლერებისა და დარგის პოპულარიზაციის მიმართულებით ბოლო 6 წლის განმავლობაში განხორციელებული ერთობლივი მნიშვნელოვანი პროექტები მიმოიხილა. ნელი მახვილაძის თქმით, „ტექინფორმისა“ და FAO-ს პარტნიორობის ფარგლებში, საქართველოსთვის ხელმისაწვდომია ისეთი მნიშვნელოვანი პლატფორმები, როგორიცაა: FAO AGRIS, FAO AGROVOC, Research4Life-ის მონაცემთა ბაზები და სხვადასხვა ინოვაციური რესურსი, რომელიც საერთაშორისო გამოცდილებას ქართულ რეალობასთან აკავშირებს და ამასთან ერთად, გამოყენებით მეცნიერებას განავითარებს, გარდა ამისა, ხელს უწყობს ინოვაციური იდეების მხარდაჭერას, სოფლის მეურნეობის ინდუსტრიასთან შედეგზე ორიენტირებული დიალოგის წარმართვასა და დარგით ახალგაზრდების დაინტერესების  მექანიზმების გაძლიერებას.   

მეცნიერებისა და ინოვაციების დღისადმი მიძღვნილი ღონისძიება გაგრძელდა პრეზენტაციებითა და სადისკუსიო პანელებით
იმის შესახებ, თუ როგორ ქმნის ინოვაციები და ტექნოლოგიები მდგრადი და  კლიმატგონივრული სოფლის მეურნეობის მომავალს. მონაწილეებმა
იმსჯელეს მანქანური სწავლების
და დიდ მონაცემებთან მუშაობის თავისებურებებზე, ხელოვნური ინტელექტის როლზე, დაფინანსების შესაძლებლობებსა და საერთაშორისო თანამშრომლობის გაფართოების
გზებზე; გარდა ამისა, განიხილეს კლიმატის ცვლილებაზე მორგებული „ჭკვიანი“ გადაწყვეტილებები
და სხვა მნიშვნელოვანი თემები.