სტუ-ის საცურაო აუზ „ტონუსის“ ახალგაზრდა მოცურავეებმა თბილისის შემოდგომის ღია პირველობაზე წარმატებით იასპარეზეს

7-8 ნოემბერს, გლდანის საცურაო აუზზე, თბილისის შემოდგომის ღია პირველობა ცურვაში გაიმართა. შეჯიბრებაში მონაწილეობდნენ 2014-2015 და 2016-2017 წლებში დაბადებული გოგოები და ბიჭები თბილისის სხვადასხვა გუნდიდან და საქართველოს რეგიონებიდან. მონაწილეებს შორის იყო საქართველოს ტექნიკური უნივერსიტეტის საცურაო აუზ „ტონუსის“ გუნდიც, რომელმაც წარმატებით იასპარეზა და არაერთი გამარჯვება მოიპოვა.

ტონუსელებმა 4×50 მეტრზე თავისუფალი სტილით და 4×50 მეტრზე კომპლექსურ ცურვაში პირველი ადგილები და ოქროს მედლები მოიპოვეს.

ორივე გუნდურ გაცურვაში გამარჯვებული გუნდის შემადგენლობაში იყვნენ ანდრია ყაჭეიშვილი, გეგა კვანჭიანი, თომა ბაღათურია და ლუკა აბზიანიძე.

ტონუსის მოცურავეებმა შთამბეჭდავი შედეგები აჩვენეს ინდივიდუალურ დისციპლინებშიც:

• გეგა კვანჭიანი – 4 ოქროს მედალი;
• ანდრია ყაჭეიშვილი – 1 ოქროსა და 2 ვერცხლის მედალი;
• თომა ბაღათურია – 1 ვერცხლისა და 2 ბრინჯაოს მედალი;
• ლუკა აბზიანიძე – 1 ვერცხლის მედალი;
• ანდრია მეფარიძე – 3 ოქროს მედალი;
• ანდრია თურქია – 1 ვერცხლის მედალი.

თბილისის შემოდგომის ღია პირველობა ახალგაზრდა მოცურავეებისთვის საკუთარი შესაძლებლობების წარმოჩენის, სპორტული გამოცდილების მიღებისა და კონკურენტულ გარემოში განვითარების მნიშვნელოვანი შესაძლებლობა იყო.

აღსანიშნავია, რომ საქართველოს ტექნიკური უნივერსიტეტის საცურაო აუზი „ტონუსი“ უნივერსიტეტის სტუდენტებსა და თანამშრომლებს აბონემენტებზე 50%-იან ფასდაკლებას სთავაზობს.

შეღავათიანი აბონემენტით სარგებლობა შესაძლებელია ორშაბათიდან შაბათის ჩათვლით, 07:00-დან 15:00 საათამდე.

დამატებითი ინფორმაციის მისაღებად დაინტერესებულ პირებს შეუძლიათ ეწვიონ საცურაო აუზ „ტონუსის“ Facebook-გვერდს ან დაუკავშირდნენ ნომერზე: 032 218 02 16.

საქართველოს ტექნიკური უნივერსიტეტი ულოცავს ახალგაზრდა სპორტსმენებს მიღწეულ წარმატებას და მომავალშიც არაერთ გამარჯვებას უსურვებს!

უნივერსიტეტი აგრძელებს სტუდენტებში სპორტული აქტივობებისა და ჯანსაღი ცხოვრების წესის მხარდაჭერას.