სტუ-ში Erasmus+ პროგრამის ფარგლებში აღმოსავლეთ პარტნიორობის ქვეყნების ინოვაციების კონკურსი ჩატარდება

საქართველოს ტექნიკური უნივერსიტეტი Erasmus+ საგრანტო პროგრამის KA2 აქტივობის ინსტიტუციური გაძლიერების პროექტის –  „ისწავლე – გააუმჯობესე – გაყიდე – მიაღწიე წარმატებას“ (LISS24 – Learn – Innovate – Sell – Succeed) ფარგლებში, მასშტაბურ ღონისძიებას –  Eastern Partnership Innovation Competition უმასპინძლებს.

პროექტის მიზანია სტუდენტებში ინოვაციური იდეების პრაქტიკული რეალიზების ხელშეწყობა, სამეწარმეო უნარების განვითარება და გამოცდილების გაზიარება საერთაშორისო გარემოში. ღონისძიება ოფიციალურად 19 მაისს გაიხსნება და მასში მონაწილეობას მიიღებენ როგორც საქართველოს, ისე აღმოსავლეთ პარტნიორობის ქვეყნების სტუდენტები, ახალგაზრდა ინოვატორები და აკადემიური სფეროს წარმომადგენლები. კონკურსის ფარგლებში მონაწილეებს შესაძლებლობა ექნებათ წარადგინონ საკუთარი სტარტაპ-იდეები, ინოვაციური პროდუქტები და ტექნოლოგიური პროექტები.

სტუ-ის ღონისძიება LISS24 პროექტის ფარგლებში რამდენიმე თვის წინ დაიგეგმა და მოიცავს ინტენსიურ მენტორინგსა და სასწავლო ტრენინგების სერიას პარტნიორ უნივერსიტეტებში საქართველსა და სომხეთში. კონკურსის ფინალურ ეტაპზე საკუთარ პროექტებს წარადგენს 6 სხვადასხვა უნივერსიტეტის 12 რჩეული გუნდი, მათ შორის საქართველოს ტექნიკური უნივერსიტეტის სტუდენტები. გამარჯვებულებს სპეციალურად შექმნილი ჟიური სამ სხვადასხვა საპრიზო ადგილზე გამოავლენს.

ღონისძიება მასშტაბურია და მას ქართველ და სომეხ კოლეგებთან ერთად დაესწრებიან პროექტის კონსორციუმის წევრები ფინეთიდან, შვედეთიდან, ესპანეთიდან და ავსტრიიდან. კონკურსი ჩატარდება სხვადასხვა კატეგორიაში, მათ შორის: ციფრული ტექნოლოგიები, სოციალური გავლენა, შემოქმედებითობა და სხვა.

საქართველოს ტექნიკური უნივერსიტეტის ადმინისტრაციის განცხადებით, საუნივერსიტეტო სივრცეში სამეწარმეო ეკოსისტემის განვითარება სულ უფრო მეტად ეფუძნება სტუდენტთა იდეების სისტემურ მხარდაჭერას. პროექტის მიზანი სწორედ ისაა, რომ ახალგაზრდებმა იდეის ჩამოყალიბების ფაზაშივე მიიღონ სტრუქტურირებული ცოდნა და აკადემიური თუ პრაქტიკული დახმარება. პროექტი LISS24 თავის მხრივ საგრძნობლად აუმჯობესებს ინოვაციურ ეკოსისტემას და მნიშვნელოვან შესაძლებლობებს ქმნის როგორც ჩვენი სტუდენტებისათვის ასევე ზოგადად, ინსტიტუციურ დონეზე.

აღსანიშნავია რომ პროექტი LISS24, წარმოადგენს Erasmus+ KA2 აქტივობის საგრანტო ინსტიტუციური განვითარების პროექტს და მიზნად ისახავს ინოვაციური კომპეტენციების ამაღლებას საინჟინრო განათლებაში. პროექტის LISS24 ინსტიტუციურ კოორდინაციას სტუ-ში ახორციელებს ტექნოლოგიების და საგრანტო პროექტების ოფისი, ხოლო შედეგების პირველადი პილოტირება მიმდინარეობს სატრანსპორტო სისტემებისა და მექანიკის ინჟინერიის ფაკულტეტზე. პროექტის პარტნიორია სტუდენტური სერვისების, კულტურისა და სპორტის დეპარტამენტი.

დამატებითი ინფორმაცია პროექტის შესახებ ხელმისაწვდომია ვებგვერდზე.