საქართველოს ტექნიკური უნივერსიტეტის სამძიმრის წერილი ასოცირებული პროფესორის, ტრისტან ბუაძის გარდაცვალების გამო

საქართველოს ტექნიკური უნივერსიტეტის რექტორი, აკადემიკოსი დავით გურგენიძე, ინფორმატიკისა და მართვის სისტემების ფაკულტეტი, უნივერსიტეტის ადმინისტრაცია, სამეცნიერო-აკადემიური წრეები და სტუდენტები მწუხარებას გამოთქვამენ ფიზიკა-მათემატიკის მეცნიერებათა აკადემიური დოქტორის, მათემატიკის დეპარტამენტის ასოცირებული პროფესორის, ბატონ ტრისტან ბუაძის გარდაცვალების გამო და სამძიმარს უცხადებენ გარდაცვლილის ოჯახსა და ახლობლებს. 

„საქართველოს ტექნიკური უნივერსიტეტი ეთხოვება შესანიშნავ ადამიანს, კოლეგასა და პედაგოგს, ნიჭიერ მკვლევარს, ინფორმატიკისა და მართვის სისტემების ფაკულტეტის მათემატიკის დეპარტამენტის ასოცირებულ პროფესორს, ფიზიკა-მათემატიკის მეცნიერებათა აკადემიურ დოქტორს, ტრისტან ბუაძეს, რომელსაც წელს 80 წელი შეუსრულდებოდა.

მრავალმხრივი იყო მისი სამეცნიერო ინტერესები – ალბათობის თეორიისა და მათემატიკური სტატისტიკის ზოგადთეორიული, სტოქასტური სისტემების სტატისტიკური ანალიზისა და სტატისტიკურ შეფასებათა პარამეტრული და არაპარამეტრული ამოცანების კვლევები, ალბათობათა განაწილების სიმკვრივეების არაპარამეტრული და პროექციული შეფასებები, გამოყენებითი სტატისტიკისა და ეკონომეტრიკის საკითხები, მასობრივი მომსახურების მათემატიკური მოდელები, უსასრულო განზომილებიანი სტატისტიკური სტრუქტურები და სხვა. 

სამეცნიერო კვლევებში, ბატონ ტრისტანთან ერთად, აქტიურად იყვნენ ჩართული მისი სტუდენტები, სხვადასხვა თაობის ახალგაზრდები, რომლებიც დღეს თავად არიან წარმატებული სპეციალისტები და მკვლევრები. 

სამძიმარს ვუცხადებთ, ბატონი ტრისტან ბუაძის ოჯახს, მეგობრებს, კოლეგებსა და აღზრდილებს. უფალმა გაუნათლოს სასუფეველი“.