სტუ-ის 4 პროექტი CIF-ის მეორე საგრანტო კონკურსის გამარჯვებულია

საქართველოს ტექნიკური უნივერსიტეტის 4-მა პროექტმა გამარჯვება მოიპოვა კონკურენტული ინოვაციის ფონდის (CIF) რიგით მეორე საგრანტო კონკურსში, რომელიც მსოფლიო ბანკის პროექტის –  „ინოვაცია, ინკლუზიურობა და ხარისხი – საქართველო I2Q“ ფარგლებში ჩატარდა.

CIF-ის მეორე საგრანტო კონკურსის გამარჯვებული გახდა საქართველოს ტექნიკური უნივერსიტეტის მიერ კონსორციუმების ფარგლებში წარდგენილი შემდეგი პროექტები: 1. „საინჟინრო საგანმანათლებლო პროგრამების ერთობლივი შემუშავება და განხორციელება დისტანციური ლაბორატორიების გამოყენებით“ (ბათუმის შოთა რუსთაველის სახელმწიფო და იაკობ გოგებაშვილის თელავის სახელმწიფო უნივერსიტეტებთან კოლაბორაციით); 2. „ინოვაციური ICT განათლება უსაფრთხო მომავლისთვის“ (პარტნიორი: ბრიტანული სასწავლო უნივერსიტეტი საქართველოში); 3. „მთის ტერიტორიების მდგრადი განვითარების სამაგისტრო პროგრამა“ (მილანის უნივერსიტეტის მთის მდგრადი განვითარების სასწავლო ცენტრთან კოლაბორაციით); 4. „ვეტერინარიის სამაგისტრო პროგრამა“ (ევროპის უნივერსიტეტთან კოლაბორაციით).

კონკურსში გამარჯვებულ პროექტებსა და მათ ავტორებს მიღწეული წარმატება მიულოცა საქართველოს განათლების, მეცნიერებისა და ახალგაზრდობის მინისტრმა გიორგი ამილახვარმა და უნივერსიტეტების წარმომადგენლებს შესაბამისი სერტიფიკატები გადასცა.

საქართველოს ტექნიკური უნივერსიტეტის მხრიდან დაჯილდოების ცერემონიას ვიცე-რექტორი, ასოცირებული პროფესორი თამარ წერეთელი, ტექნოლოგიებისა და საგრანტო პროექტების ოფისის უფროსი თეა მურვანიძე და გამარჯვებული პროექტების ხელმძღვანელები ესწრებოდნენ.

ვიცე-რექტორის, თამარ წერეთლის განცხადებით, საქართველოს ტექნიკური უნივერსიტეტისთვის კონკურენტული ინოვაციის ფონდის საგრანტო კონკურსში გამარჯვება, უდავოდ, დიდი სტიმულის მიმცემია, მით უმეტეს, რომ 14 გამარჯვებულ პროექტს შორის ოთხი – საქართველოს ტექნიკურ უნივერსიტეტს ეკუთვნის. მისი განმარტებით, საგრანტო დაფინანსების მოპოვება უნივერსიტეტს დამატებით შესაძლებლობას უქმნის, კონსორციუმების ფარგლებში, ქართულ და უცხოურ პარტნიორ უნივერსიტეტებთან კოლაბორაციით, კონკრეტული მიმართულებები განავითაროს, შეიმუშაოს ახალი ერთობლივი და ორმაგი საერთაშორისო ხარისხის აკადემიური პროგრამები, წარმატებით განახორციელოს სასწავლო გარემოს მოდერნიზება და ამავდროულად, დამსაქმებელ ორგანიზაციებთან კავშირები გააძლიეროს.

„ქართული უნივერსიტეტების განვითარებისთვის უაღრესად საჭირო და დროული საგრანტო კონკურსების ინიციირებისთვის რექტორის, აკადემიკოს დავით გურგენიძის, ჩვენი საუნივერსიტეტო საზოგადოებისა და სტუდენტების სახელით, გვსურს მადლობა გადავუხადოთ საქართველოს მთავრობას, განათლების, მეცნიერებისა და ახალგაზრდობის მინისტრს, გიორგი ამილახვარს, მინისტრის მოადგილე ნოდარ პაპუკაშვილს, მსოფლიო ბანკს და კონკურენტული ინოვაციის ფონდს. მოპოვებული საგრანტო დაფინანსებით, საქართველოს ტექნიკურ უნივერსიტეტს ქმედითად შეეწყობა ხელი, განახორციელოს სტრატეგიული გეგმები, რაც პირდაპირ კავშირშია სწავლა-სწავლების პროცესის სრულყოფასთან, ლაბორატორიულ სწავლებაზე დაფუძნებული და შრომის ბაზართან ადაპტირებული მაღალტექნოლოგიური საგანმანათლებლო პროგრამების შემუშავებასა და კვლევების ინტერნაციონალიზაციასთან“, – აღნიშნავს თამარ წერეთელი.

კონკურენტული ინოვაციების ფონდის (CIF) მეორე საგრანტო კონკურსის ფარგლებში გამარჯვებულ 14 საუნივერსიტეტო პროექტზე, ჯამურად, 2,2 მილიონი აშშ დოლარი გაიცემა. CIF-ის საგრანტო კონკურსებში, რომელიც 2022 წლიდან ხორციელდება, დაფინანსება 27-მა საგრანტო განაცხადმა მოიპოვა.