სტუ-ის რექტორი საუნივერსიტეტო საზოგადოების სახელით პროფესორ ვაჟა პაპასკირის დაბადების დღეს ულოცავს

საქართველოს ტექნიკური უნივერსიტეტის რექტორი, აკადემიკოსი დავით გურგენიძე, საუნივერსიტეტო საზოგადოების სახელით, სტუ-ის ნიკო მუსხელიშვილის საუნივერსიტეტო ბიბლიოთეკის ხელმძღვანელს, პროფესორ ვაჟა პაპასკირს დაბადების დღეს ულოცავს.

„ბატონო ვაჟა, საქართველოს ტექნიკური უნივერსიტეტის საუნივერსიტეტო საზოგადოების სახელით, გულითადად და განსაკუთრებული პატივისცემით გილოცავთ დაბადებიდან 73-ე წლისთავს!

თქვენი ცხოვრება და პროფესიული მოღვაწეობა მჭიდროდ არის დაკავშირებული ქართული განათლების, მეცნიერებისა და საუნივერსიტეტო კულტურის განვითარებასთან. წლების განმავლობაში თქვენ ღირსეულად ემსახურებით საქართველოს ტექნიკურ უნივერსიტეტს, მის სტუდენტობას, პროფესურასა და სამეცნიერო საზოგადოებას. როგორც ნიკო მუსხელიშვილის საუნივერსიტეტო ბიბლიოთეკის ხელმძღვანელი, თქვენ არა მხოლოდ ერთ-ერთი უმნიშვნელოვანესი საგანმანათლებლო სივრცის მზრუნველი და ორგანიზატორი ბრძანდებით, არამედ იმ სულიერი მემკვიდრეობის დამცველი, რომელიც ცოდნის უწყვეტობასა და ეროვნული საგანმანათლებლო ტრადიციების შენარჩუნებას უზრუნველყოფს.

განსაკუთრებული მადლიერებით უნდა აღინიშნოს თქვენი თავდადება და მოქალაქეობრივი პასუხისმგებლობა იმ უმძიმეს წლებში, როდესაც საქართველოს სახელმწიფოს ურთულესი სოციალურ-ეკონომიკური გამოწვევების წინაშე იდგაა, როცა ხშირად ხელფასებისა და პენსიების გაცემაც კი ვერ ხერხდებოდა. სწორედ მაშინ, თქვენი პროფესიონალიზმის, შეუპოვრობისა და ბიბლიოთეკის თანამშრომლებთან ერთად გაწეული თავდაუზოგავი შრომის წყალობით, შესაძლებელი გახდა უნიკალური საბიბლიოთეკო ფონდის, სამეცნიერო ლიტერატურისა და უნივერსიტეტის ერთ-ერთი უმნიშვნელოვანესი საგანმანათლებლო კერის გადარჩენა – ეს იყო არა მხოლოდ პროფესიული მოვალეობის შესრულება, არამედ ნამდვილი სამოქალაქო გმირობა და ეროვნული მნიშვნელობის საქმე.

დარწმუნებული ვართ, რომ თქვენი გამოცდილება და ენერგია მომავალშიც მრავალი კეთილი საქმის საწინდარი იქნება ჩვენი უნივერსიტეტისა და ქართული აკადემიური სივრცისთვის.

გისურვებთ ჯანმრთელობას, ბედნიერებას, პროფესიულ წარმატებებსა და კიდევ მრავალ ნაყოფიერ წელს საქართველოს მეცნიერებისა და განათლების სამსახურში.

პატივისცემით,საუნივერსიტეტო საზოგადოების სახელით“.

– აკადემიკოსი დავით გურგენიძე