თბილისში DUGEOR-ის დასკვნითი საერთაშორისო კონფერენცია გაიმართა

2 სექტემბერს,  საქართველოს ტექნიკურ უნივერსიტეტში Erasmus+ CBHE პროექტის DUGEOR-ის დასკვნითი საერთაშორისო კონფერენცია გაიმართა.

კონფერენციაზე შეჯამდა პროექტის ფარგლებში საქართველოში დუალური უმაღლესი განათლების განვითარებისთვის გაწეული სამუშაო — ევროპული გამოცდილების შესწავლიდან და დუალური უმაღლესი განათლების ზოგადი მოდელის შექმნიდან, სამართლებრივი და ხარისხის უზრუნველყოფის ჩარჩოების განვითარებამდე და მოდელის რეალურ საუნივერსიტეტო და სამუშაო გარემოში გამოცდამდე.

DUGEOR-ის მიდგომის მთავარი იდეაა, რომ უნივერსიტეტი და კომპანია სტუდენტისთვის ორი ერთმანეთთან დაკავშირებული სასწავლო გარემო გახდეს. კერძოდ, სამუშაო ადგილზე სწავლა არ იყოს მხოლოდ დამატებითი პრაქტიკა, არამედ საგანმანათლებლო პროგრამის ინტეგრირებული ნაწილი.

კონფერენციაზე საკუთარი ინსტიტუციური მოდელები და საპილოტე გამოცდილება წარმოადგინეს საქართველოს ტექნიკურმა უნივერსიტეტმა, GIPA-მ, BNU-მ, თელავის სახელმწიფო უნივერსიტეტმა და ბათუმის სახელმწიფო საზღვაო აკადემიამ, მათ პარტნიორ კომპანიებსა და ორგანიზაციებთან ერთად.

ღონისძიებაში მონაწილეობდნენ განათლებისა და მეცნიერების სამინისტროს, განათლების ხარისხის განვითარების ეროვნული ცენტრის, პარტნიორი უნივერსიტეტების, კერძო სექტორისა და საერთაშორისო პარტნიორების წარმომადგენლები. საკუთარი გამოცდილება გააზიარეს DUGEOR-ის საპილოტე პროცესში მონაწილე სტუდენტებმაც.

კონფერენციის დასკვნით ნაწილში მონაწილეებმა იმსჯელეს მთავარ კითხვაზე, თუ როგორ შეიძლება DUGEOR-ის ფარგლებში მიღებული საპილოტე გამოცდილება საქართველოში დუალური უმაღლესი განათლების მდგრად სისტემად გადაიქცეს.

DUGEOR-ის დასრულება ამ პროცესის დასკვნითი ნაწილი  არ არის, შემდეგი ნაბიჯი იქნება  პროექტის ფარგლებში შექმნილი გამოცდილებისა და უნივერსიტეტ–ინდუსტრიის თანამშრომლობის მოდელების შემდგომი განვითარება და მდგრადობის უზრუნველყოფა.