TUDA-ს იდეების კონკურსი ადგილობრივი და საერთაშორისო სტუდენტებისთვის – „თქვენზე მორგებული უბანი!“

თბილისის მუნიციპალიტეტის ტრანსპორტისა და ურბანული განვითარების სააგენტო (TUDA) აცხადებს იდეების კონკურსს „თქვენზე მორგებული უბანი! – იდეების კონკურსი ახალი ურბანული გამოცდილებისთვის“. კონკურსი გერმანიის ფინანსური თანამშრომლობის ფარგლებში, KfW ბანკის მხარდაჭერით მიმდინარე პროექტის „მდგრადი ურბანული მობილობა თბილისში” (Sustainable Urban Mobility in Tbilisi – SUM Tbilisi) ნაწილია.

კონკურსის მიზანია დედაქალაქში მცხოვრები ადამიანების ყოველდღიური გამოცდილებისა და ცოდნის საფუძველზე გამოვლინდეს პრაქტიკული და საზოგადოებისთვის სასარგებლო იდეები, რომლებიც მარჯანიშვილისა და მიმდებარე ტერიტორიებზე ურბანული გარემოსა და გადაადგილების პირობების გაუმჯობესებას შეუწყობს ხელს.

მონაწილეობა შეუძლია ნებისმიერ პირს, პირთა ჯგუფს ან ორგანიზაციას, რომელსაც საკონკურსო ტერიტორიასთან ყოველდღიური კავშირი აქვს ­- მაგალითად, იქ ცხოვრობს, მუშაობს, სწავლობს, რეგულარულად გადაადგილდება. განსაკუთრებით საინტერესოა სტუდენტების წინადადებები საჯარო სივრცეების, უსაფრთხოების, ხელმისაწვდომობის, გარემოს დაცვისა და თანამედროვე ურბანული გარემოს განვითარების შესახებ.

მონაწილეობისთვის პროფესიული ან სექტორული გამოცდილება სავალდებულო არ არის. განაცხადის პირველ ეტაპზე მონაწილემ უნდა აღწეროს: არსებული პრობლემა, შესაბამისი ადგილმდებარეობა, პრობლემის მოგვარების გზა და ის, თუ ვის და როგორ დაეხმარება ეს ინიციატივა.

განაცხადების მიღების ბოლო ვადაა 2026 წლის 31 ოქტომბერი, 17:00 საათი. განაცხადის წარდგენა შესაძლებელია ოფიციალური ონლაინფორმით, ელფოსტაზე ideacompetition@tbilisi.gov.ge ან თბილისის მერიაში, ჟ. შარტავას ქუჩა 7.

გამარჯვებული იდეების ავტორებისთვის გათვალისწინებულია არამონეტარული ჯილდოები.

კონკურსის შესახებ დეტალური ინფორმაციისთვის ონლაინ საინფორმაციო შეხვედრა დაგეგმილია 13 ოქტომბერს (2026 წ.); TUDA-ს წარმომადგენლები სტუდენტებს კონკურსის მიზანს და მონაწილეობის პირობებს გააცნობენ.

დამატებითი კითხვების შემთხვევაში დაუკავშირდით ორგანიზატორებს ელფოსტაზე ideacompetition@tbilisi.gov.ge ან ტელეფონზე (+995) 555 900 281 / (+995 32) 2 72 22 22, ორშაბათიდან პარასკევის ჩათვლით, 10:00-დან 18:00 საათამდე.

სრული პირობები, ოფიციალური რუკა და განაცხადის ფორმა იხილეთ ვებგვერდზე.

კონკურსი ღიაა ნებისმიერი სპეციალობის სტუდენტისთვის, მათ შორის უცხოელი სტუდენტებისთვის. სტუ-ის სტუდენტებს კონკურსის შესახებ დეტალური ინფორმაციისთვის შეუძლიათ მიმართონ თავიანთი ფაკულტეტის დეკანატს.