UNI4VERSE FINEDU-ს საინფორმაციო შეხვედრა სტუ-ში

GITA-ს საუნივერსიტეტო კონკურსი სტუდენტებს ფინანსური განათლებისა და ტექნოლოგიების მიმართულებით ინოვაციური პროტოტიპების შექმნისა და Web Summit-ზე გამგზავრების შანსს აძლევს.

საქართველოს ტექნიკურ უნივერსიტეტში, საქართველოს ინოვაციებისა და ტექნოლოგიების სააგენტოსა (GITA) და FinEdu-ს ინიციატივით, საუნივერსიტეტო კონკურსის – UNI4VERSE FINEDU-ს საინფორმაციო შეხვედრა ჩატარდა. სტუდენტებს პროექტის დეტალები გააცნეს: ავთო თავდიშვილმა (UNI4VERSE პროექტის კოორდინატორი), ზურა კახიძემ (სტარტაპ რანკოს თანადამფუძნებელი და მენტორი) და თამთა შვანგირაძემ (ეროვნული ბანკის წარმომადგენელი).

შეხვედრაზე ხაზგასმით აღინიშნა, სტუდენტების ჩართულობის მნიშვნელობა რეალური ფინანსური გამოწვევების გადაჭრაში ხელოვნური ინტელექტისა და თანამედროვე IT ინსტრუმენტების გამოყენებით.

კონკურსი მოიცავს ისეთ მნიშვნელოვან მიმართულებებს, როგორიცაა ფინანსური სერვისების ინტეგრაცია, გრძელვადიანი დაგეგმვა, ფინანსური უსაფრთხოება, ყოველდღიური ხარჯების მართვა და მცირე ბიზნესის ფულადი ნაკადების (Cash Flow) ანალიზი. წლევანდელი მთავარი პრიზი განსაკუთრებით მასშტაბურია – პირველადგილოსანი გუნდი სრულად დაფინანსებით გაემგზავრება გლობალურ ტექნოლოგიურ კონფერენცია WEB SUMMIT-ზე, ხოლო საპრიზო ფონდი 20,000 ლარის გრანტს ითვალისწინებს.

პროექტში მონაწილეობა შეუძლიათ 17 წლის და უფროსი ასაკის ნებისმიერი ფაკულტეტის ბაკალავრიატისა და მაგისტრატურის სტუდენტებს. რეგისტრაცია მიმდინარეობს გუნდურად (2-4 სტუდენტი +1 მენტორი), ხოლო შიდაუნივერსიტეტო კონკურსის შედეგად უნივერსიტეტის სახელით ფინალში 1 საუკეთესო გუნდი იასპარეზებს.

მნიშვნელოვანი თარიღები და პირობები:

•  რეგისტრაციის ბოლო ვადა: 6 ოქტომბერი UNI4VERSE FINEDU სარეგისტრაციო ფორმა

• ინტენსიური ტრენინგები და მენტორშიფი (FabLab): 26-30 ოქტომბერი

• Demo Day (თბილისის ტექნოპარკი): 2 ნოემბერი

დაინტერესებულ სტუდენტებს ეძლევათ უნიკალური შანსი, აიმაღლონ პროფესიული უნარები და ჩაერთონ ქვეყნის მასშტაბით მიმდინარე ტექნოლოგიურ გამოწვევაში.