სტუ-სა და ბელარუსის ინფორმატიკისა და რადიოელექტრონიკის სახელმწიფო უნივერსიტეტს შორის თანამშრომლობის მემორანდუმი გაფორმდა

საქართველოს ტექნიკური უნივერსიტეტის რექტორმა, აკადემიკოსმა დავით გურგენიძემ და ბელარუსის ინფორმატიკისა და რადიოელექტრონიკის სახელმწიფო უნივერსიტეტის რექტორმა, პროფესორმა ვადიმ ბოგუშმა მეცნიერებისა და განათლების სფეროში აკადემიური თანამშრომლობის გაფართოების მიზნით, საქართველო-ბელარუსის მთავრობათაშორისი ეკონომიკური თანამშრომლობის კომისიის მეშვიდე სხდომის ფარგლებში, მემორანდუმს მოაწერეს ხელი.

მემორანდუმი ითვალისწინებს უნივერსიტეტებს შორის პარტნიორობის გაღრმავებას და ერთობლივი საგანმანათლებლო-სამეცნიერო პროექტების განხორციელებას. დოკუმენტის ფარგლებში მხარეები შეთანხმდნენ აკადემიური პერსონალისა და სტუდენტების გაცვლითი პროგრამების განვითარებაზე, ერთობლივი კვლევითი პროექტების განხორციელებაზე, საერთაშორისო კონფერენციებისა და სამეცნიერო ღონისძიებების ორგანიზებაზე.

საქართველოს ტექნიკური უნივერსიტეტის რექტორის განცხადებით, ორ უნივერსიტეტს შორის თანამშრომლობა მოიცავს საინფორმაციო ტექნოლოგიების, რადიოელექტრონიკისა და ინოვაციური ტექნოლოგიების მიმართულებით გამოცდილებისა და ცოდნის გაზიარებას, რაც ორივე უნივერსიტეტის სამეცნიერო და საგანმანათლებლო პოტენციალის გაძლიერებას შეუწყობს ხელს. აკადემიკოს დავით გურგენიძის თქმით, შეთანხმება ხელს შეუწყობს საერთაშორისო აკადემიური კავშირების გაფართოებას, ახალი კვლევითი შესაძლებლობების შექმნას და სტუდენტებისა და მკვლევრების პროფესიულ განვითარებას.

„საქართველოს ტექნიკური უნივერსიტეტისთვის საერთაშორისო აკადემიური პარტნიორობის გაფართოება ერთ-ერთი სტრატეგიული პრიორიტეტია. სწორედ ამ კონტექსტში განსაკუთრებულ მნიშვნელობას ვანიჭებთ ბელარუსის ინფორმატიკისა და რადიოელექტრონიკის სახელმწიფო უნივერსიტეტთან გაფორმებულ მემორანდუმს, რომელიც საფუძველს უყრის ჩვენი ინსტიტუციური თანამშრომლობის ახალ ეტაპს. შეთანხმება მიზნად ისახავს ურთიერთობების გაღრმავებას, შედეგზე ორიენტირებული სამეცნიერო-საგანმანათლებლო თანამშრომლობის განვითარებას ისეთ მნიშვნელოვან მიმართულებებში, როგორიცაა საინფორმაციო ტექნოლოგიები, რადიოელექტრონიკა, ინჟინერია და თანამედროვე ციფრული ინოვაციები. ჩვენთვის განსაკუთრებით მნიშვნელოვანია ერთობლივი კვლევითი პროექტების განხორციელება, ახალგაზრდა მეცნიერებისა და დოქტორანტების ჩართულობა საერთაშორისო სამეცნიერო სივრცეში, ასევე აკადემიური პერსონალისა და სტუდენტების გაცვლითი პროგრამების განვითარება, რაც განსაკუთრებით მნიშვნელოვანია ახალგაზრდა მკვლევრებისა და დოქტორანტებისთვის, მათ ეძლევათ შესაძლებლობა ჩაერთონ საერთაშორისო კვლევით პროექტებში, იმუშაონ მრავალეროვან სამეცნიერო გუნდებში, მიიღონ გამოცდილება თანამედროვე კვლევით ლაბორატორიებში და გაეცნონ უახლეს ტექნოლოგიურ მიდგომებსა და მეთოდოლოგიებს. გაცვლითი პროგრამები, თავის მხრივ, ქმნის მნიშვნელოვან აკადემიურ გარემოს ცოდნისა და გამოცდილების ინტენსიური გაზიარებისთვის. სტუდენტებსა და აკადემიურ პერსონალს შესაძლებლობა აქვთ გაეცნონ პარტნიორი უნივერსიტეტების საგანმანათლებლო მოდელებს, კვლევით ინფრასტრუქტურასა და ინოვაციურ პრაქტიკებს, რაც მათ პროფესიულ განვითარებასა და აკადემიურ ზრდას მნიშვნელოვან სტიმულს აძლევს.

გარდა ამისა, თანამშრომლობის ფარგლებში შესაძლებელი იქნება ერთობლივი სამეცნიერო კონფერენციების, კვლევითი ლაბორატორიული პროექტებისა და საერთაშორისო საგანმანათლებლო პროგრამების განხორციელება. მემორანდუმი მნიშვნელოვნად შეუწყობს ხელს ორივე უნივერსიტეტის სამეცნიერო და საგანმანათლებლო შესაძლებლობების განვითარებას, ასევე საერთაშორისო თანამშრომლობის გაძლიერებას მეცნიერებისა და ტექნოლოგიების სფეროში“, – აცხადებს დავით გურგენიძე.

როგორც ბელარუსის ინფორმატიკისა და რადიოელექტრონიკის სახელმწიფო უნივერსიტეტის (BSUIR) რექტორმა, სტუ-ის რექტორთან, აკადემიკოს დავით გურგენიძესთან შეხვედრისას განაცხადა 1964 წელს დაარსებული BSUIR-ი ერთ-ერთი ყველაზე ცნობილი ტექნიკური უნივერსიტეტია ბელარუსში, სადაც ინფორმატიკის, IT-ის და რადიოელექტრონიკის მიმართულები 10 ფაკულტეტზე ისწავლება.

პროფესორ ვადიმ ბოგუშის თქმით, GTU-სა და BSUIR-ი ს შორის გაფორმებული თანამშრომლობის მემორანდუმი ითვალისწინებს ისეთ მნიშვნელოვან საკითხებს, როგორიცაა ერთობლივი პროგრამების შემუშავება კვლევისა და პროგრამის განვითარების საერთო ინსტიტუციური პრიორიტეტების საფუძველზე, ასევე ერთობლივი კვლევის განხორციელება აკადემიური და ტექნიკური პერსონალის გაცვლის გზით.

„ჩვენთვის განსაკუთრებულად მნიშვნელოვანია ისეთი პარტნიორობის განვითარება, რომელიც ეფუძნება საერთო ინტერესებს მეცნიერებისა და ინოვაციების სფეროში. საქართველოს ტექნიკურ უნივერსიტეტთან გაფორმებული მემორანდუმი შექმნის რეალურ შესაძლებლობას ერთობლივი საგანმანათლებლო პროგრამებისა და კვლევითი პროექტების განხორციელებისთვის. დარწმუნებული ვართ, რომ აკადემიური და ტექნიკური პერსონალის გაცვლა, ასევე სტუდენტების ჩართულობა, მნიშვნელოვნად გააძლიერებს ორივე უნივერსიტეტის პოტენციალს და ხელს შეუწყობს თანამედროვე ტექნოლოგიების განვითარებას”, – აცხადებს ვადიმ ბოგუში.