ევროპის უნივერსიტეტების დელეგაცია სტუ-ში

საქართველოს ტექნიკურ უნივერსიტეტში, Erasmus+ საერთაშორისო მობილობის პროექტის ფარგლებში, სამუშაო ვიზიტით იმყოფებიან პროექტის კოორდინატორი უნივერსიტეტების წარმომადგენლები, პროფესორები: პროექტის კოორდინატორი სიბილა ბოროიევიჩ შოშტარიჩი (Prof. Sibila Borojević Šoštarić) და სტანკო რუჟიჩიჩი (Prof. Stanko Ružičić) ზაგრების უნივერსიტეტიდან (ხორვატია) და პაველ დანიჰელკა (Prof. Pavel Danihelka) ოსტრავის ტექნიკური უნივერსიტეტიდან (ჩეხეთის რესპუბლიკა).

სტუმრები სტუ-ის სამთო-გეოლოგიურ და მთის მდგრადი განვითარების ფაკულტეტზე სამუშაო შეხვედრებს გამართავენ, ასევე,  პრეზენტაციების სახით თავიანთ უნივერსიტეტებს  წარმოადგენენ.

სტუ-ის საერთაშორისო ურთიერთობების დეპარტამენტის უფროსის თქმით, საქართველოს ტექნიკური უნივერსიტეტი საერთაშორისო თანამშრომლობის გასაღრმავებლად ევროკავშირის მიერ დაფინანსებულ საერთაშორისო მობილობის პროექტში მონაწილეობს. თეა მურვანიძის განცხადებით, პროექტს, რომლის მიზანია უმაღლესი განათლების სფეროში აკადემიური თანამშრომლობის გაძლიერება, სტუდენტებისა და აკადემიური პერსონალის საერთაშორისო მობილობის ხელშეწყობა, თანამედროვე საგანმანათლებლო პრაქტიკის გაზიარება და ევროპულ საგანმანათლებლო სივრცეში ინტეგრაციის პროცესის გაღრმავება, კოორდინაციას ევროპული უნივერსიტეტები უწევენ.

„პროექტის ფარგლებში, საქართველოს ტექნიკური უნივერსიტეტის სტუდენტებსა და პროფესორ-მასწავლებლებს შესაძლებლობა ექნებათ მონაწილეობა მიიღონ გაცვლით პროგრამებში, საერთაშორისო ტრენინგებში, კვლევით აქტივობებსა და ერთობლივ აკადემიურ ინიციატივებში. ამ ტიპის თანამშრომლობა მნიშვნელოვნად შეუწყობს ხელს უნივერსიტეტში განათლების ხარისხის ამაღლებას და საერთაშორისო გამოცდილების გაზიარებას. ERASMUS+ პროგრამაში მონაწილეობა მნიშვნელოვანი ნაბიჯია საერთაშორისო პარტნიორობის გაფართოებისა და ევროპულ უნივერსიტეტებთან თანამშრომლობის გაძლიერების მიმართულებით. პროექტი ასევე ითვალისწინებს ინოვაციური სწავლების მეთოდების დანერგვას, კულტურათაშორისი დიალოგის გაძლიერებას და ახალგაზრდებისთვის ახალი აკადემიური და კვლევითი შესაძლებლობების შექმნას“.

  – საერთაშორისო ურთიერთობების დეპარტამენტის უფროსი თეა მურვანიძე

მობილობის პროგრამის ფარგლებში კოორდინატორი უნივერსიტეტების წარმომადგენლები სამთო-გეოლოგიურ და მთის მდგრადი განვითარების ფაკულტეტის სტუდენტებისა და თანამშრომლებისთვის გეოლოგიისა და შრომის უსაფრთხოების მიმართულებით საჯარო ლექციებს გამართავენ, ხოლო ფაკულტეტის პროფესორ-მასწავლებლები და სტუდენტები საუნივერსიტეტო სივრცეში სტუმრებს აკადემიურ, კვლევით და სოციალურ-კულტურულ აქტივობებს შესთავაზებენ.